Ինչպես է Առուշանյանը ընդունել հաղթանակի լուրը. ArmDaily
Երեկ Գորիսի ՏԻՄ ընտրություններում հաղթեց Առուշանյան դաշինքը, որը գլխավորում է Առուշ Առուշանյանը։ Նրա օգտին քվեարկել է 6256 ընտրող։ Նշենք, որ Առուշանյանը այժմ կալանքի տակ է և գտնվում է «Երևան-Կենտրոն» քրեակատարողական հիմնարկում։
ArmDaily.am-ի հետ զրույցում Առուշանյանի պաշտպան Էրիկ Ալեքսանյանն ասել է, որ լուրը նորընտիր համայնքապետը շատ զուսպ, շատ համեստ է ընդունել, իր տեսակին բնորոշ։
«Նաև ասեց, որ սա հաղթանակի սկիզբն է»,- ասել է պաշտպանը։
Նոյեմբերի 5-ին տեղի է ունենալու Առուշ Առուշանյանի գործով դատական նիստ։ Ալեքսանյանը նշեց, որ պաշտպանական կողմը բարձրացնելու է խափանման միջոցի փոփոխման հարցը։
Հարցին՝ որքանով կարող են ընտրությունների արդյունքները և դատավարությունը միմյանց վրա ազդեցություն ունենալ՝ պաշտպանը նշեց, որ երկու գործընթացները մեկը մյուսի հետ փոխկապակցված չեն։
«Անազատության մեջ գտնվելու պարագայում առաջին տեղակալն է իրականացնելու պարտականությունները, մինչև Առուշանյանի ազատումը»,- ասել է պաշտպանը։
