Շուշին ընկավ, քանի որ հրամանատար չուներ, զորք չկար, անկազմակերպ պաշտպանություն էր. Շուշիի քաղաքապետ

«Շուշին ընկավ, որովհետև հրամանատար չուներ, կանոնավոր զորք չկար, անկազմակերպ պաշտպանություն էր»,- այս մասին 24TV-ի «Հարցազրույց» հաղորդման եթերում նշեց Շուշիի քաղաքապետ Արծվիկ Սարգսյանը։
 

Քաղաքապետի համոզմամբ, Շուշին դժգույն և դժբախտ չէր, այն ուրախ և սիրուն քաղաք էր, վերջին տարիներին շինհրապարակ էր դարձել։
 

Սարգսյանի պնդմամբ, իրենք երբևէ չէին կարող սպասել, որ քաղաքը ինչ-որ մի օր Ադրբեջանի կազմում կհայտնվի։
 

Արծվիկ Սարգսյանը վստահ է՝ եթե մի փոքր կազմակերպվածություն և զորք լիներ, ապա հնարավոր կլիներ քաղաքը պաշտպանել։ 

«Ես շատ եմ տեսել Հայաստանից տղաներ եկած, բայց հրամանատարներ չեն ունեցել.... Կային, քանակ ունեինք, բայց ամեն ինչ անկազմակերպ էր: Պատասխանատվությունը պետք  է կրեն Հադրութից սկսած: Ինչպես եղավ որ Հադրութը գրավվեց, գյուղերը գրավվեցին: Ճիշտ է՝ ադրբեջանցիները գերժամանակակից զենքեր էին կիրառում, իրենց քանակն էլ էր շատ, մերն էլ դե զենքն էլ չէր էդքան նորմալ, ասում եմ՝ բանակ պետք է լիներ, որ կանգներ, պաշտպաներ: Զինվոր պետք  է լիներ, նրա կողքն էլ կանգնած աշխարհազորը: Ես իմ տեսածն եմ ասում, որ զինվոր կար, բայց հրամանատարներ չկային...»: