Ադրբեջանը ռուսական կողմից սպասում է Լեռնային Ղարաբաղ օտարերկրացիների «անօրինական այցերի» հարցի լուծմանը. Ալիև

Ադրբեջանը ռուսական կողմից սպասում է Լեռնային Ղարաբաղ օտարերկրյա քաղաքացիների «անօրինական այցերի» հարցի լուծմանը։ Այս մասին իտալական La Repubblica պարբերականին տված հարցազրույցում ասել է Ադրբեջանի նախագահ Իլհամ Ալիևը։
 

«Օտարերկրացիները պետք է Ադրբեջանից թույլտվություն ստանան՝ այցելելու ռուս խաղաղապահների պատասխանատվության գոտում գտնվող ադրբեջանական տարածքներ»,- ասել է Ալիևը։ Միևնույն ժամանակ, նա հայտնել է, որ ընդհանուր առմամբ գոհ է ռուս խաղաղապահների գործունեությունից։ Ըստ նրա՝ ռուս խաղաղապահները տեղակայված են Ադրբեջանում՝ «Ղարաբաղյան շրջանում»։ 

Պատասխանելով Իրանի հետ լարվածության վերաբերյալ հարցին՝ Ալիևը հայտնել է, թե «Հայաստանի որոշ քաղաքների միջև ճանապարհն անցնում է Ադրբեջանի տարածքով», և իրենք տեսել են, որ այդ  ճանապարհն օգտագործվել է ապրանքների ապօրինի տեղափոխման համար դեպի Ղարաբաղ:

«Մենք պատրաստեցինք դիվանագիտական ​​նոտա, հրավիրեցինք դեսպանին և հանրայնացրինք՝ դա դադարեցնելու համար: Բայց իրականում իրավիճակն ավելի վատացավ՝ Իրանից Ղարաբաղ մեկնող բեռնատարների թիվն ավելացավ: Մենք այս քայլը համարեցինք հարված, կամայական անհարգալից վերաբերմունք: Հետո ձեռնարկեցինք այլ միջոցներ, որոնք լիովին օրինական էին, և դա մեծ շփոթություն առաջացրեց և անհարկի գործողություններ հարևան երկրում: Արվեցին անտեղի հայտարարություններ, հնչեցին սպառնալիքներ, զորավարժություններ անցկացվեցին մեր սահմանի մոտ...»,- ասել է Ալիևը: