Իսրայելը՝ ՊՆ նախարարի մակարդակով սպառնում է Իրանին
Իսրայելի պաշտպանության նախարար Բենի Հանցը Իրանին մեղադրել է անցած ամիս իր տարածքից նավթային լցանավին անօդաչու թռչող սարքի մահացու հարված հասցնելու մեջ, հաղորդում է Reuters-ը:
«Մեր գնահատականներով՝ Mercer Street տանկերի վրա հարձակման համար օգտագործված ԱԹՍ-ն արձակվել է Իրանից եւ Իրանի ղեկավարության խրախուսմամբ»,- ճեպազրույցի ժամանակ օտարերկրյա դիվանագետներին ասել է Հանցը:
Հանցն ավելի վաղ նախազգուշացրել էր, որ Իսրայելը պատրաստ է Իրանի դեմ ռազմական գործողությունների, եւ կոչ էր արել միջազգային գործողություններ ձեռնարկել «իրանական ագրեսիան» դադարեցնելու համար:
Չորեքշաբթի օրը Հանցը կրկնապատկել է այդ սպառնալիքները՝ հայտարարելով, որ Իսրայելը «գործելու միջոցներ ունի եւ չի վարանի դա անել: Ես չեմ բացառում այն հավանականությունը, որ Իսրայելը հետագայում ստիպված կլինի միջոցներ ձեռնարկել միջուկային Իրանը կանխելու համար»:
Օմանի ափերի մոտ գտնվող Mercer Street նավթային լցանավին հուլիսի 29-ին հարված էր հասցվել անօդաչու թռչող սարքից: Հարձակման հետեւանքով զոհվել էր երկու մարդ՝ Մեծ Բրիտանիայի քաղաքացի եւ Ռումինիայի քաղաքացի: Լցանավը շահագործվում է իսրայելցի միլիարդատիրոջը պատկանող ընկերության կողմից:
Միացյալ Նահանգները, Մեծ Բրիտանիան եւ Իսրայելը դրա համար մեղադրել են Իրանին, թեեւ այդ երկրներից ոչ մեկը դեռ չի տրամադրել ապացույցներ կամ հետախուզական տվյալներ` իրենց հայտարարությունները հաստատելու համար: Իրանը հերքում է որեւէ անօրինականություն:
