Հայաստանի և Ադրբեջանի միջև խաղաղության պայմանագրի բացակայությունը նշանակում է խաղաղության բացակայություն Հարավային Կովկասում. Իլհամ Ալիև

Բաքվի վարչակազմի ղեկավար Ալիևը հայտարարել է, որ ղարաբաղյան հակամարտությունն արդեն լուծված է, այս հարցի շուրջ բանակցությունների անհրաժեշտություն չկա։

Այսօր Ալիևը Բաքվում ընդունել է Ռումինիայի արտաքին գործերի նախարար Բոգդան Աուրեսկուին, Ավստրիայի արտաքին գործերի նախարար Ալեքսանդր Շելենբերգին, Լիտվայի արտգործնախարար Գաբրիելուս Լանդսբերգիսին և Եվրամիության պատվիրակությանը, ովքեր այցելել էին Ադրբեջան ՝ ԵՄ արտաքին քաղաքականության և անվտանգության հարցերով գերագույն հանձնակատար Խոսեպ Բորելի մանդատի հիման վրա:

«Մենք ներկայումս գտնվում ենք հետկոնֆլիկտային զարգացման վիճակում: Լեռնային Ղարաբաղի հակամարտությունը լուծված է: Այս առումով քննարկելու բան չկա: Նոյեմբերի 10-ին ստորագրված եռակողմ հռչակագիրը պարզապես հրադադարի համաձայնագիր չէ, ինչպես փորձում են ներկայացնել որոշ միջազգային քաղաքական գործիչներ։ Յուրաքանչյուրը, ով ծանոթանա այդ փաստաթղթի հետ, կտեսնի, որ խոսքը ոչ միայն զինադադարի մասին է, այլ նաև շատ այլ հարցերի: Մենք պետք է մտածենք հետկոնֆլիկտային իրավիճակի մասին: Ադրբեջանի և Հայաստանի միջև խաղաղության պայմանագրի բացակայությունը նշանակում է խաղաղության բացակայություն Հարավային Կովկասում», հայտարարել է Ալիևը: