«Ադրբեջանն ամբողջովին կատարում է եռակողմ պայմանավորվածությամբ նախատեսված իր պարտավորությունները». Բայրամով

Այսօր քննարկված հիմնական թեմաներից մեկը եռակողմ պայմանավորվածության իրագործումն էր: Ադրբեջանական կողմը կարծում է, որ այս համաձայնագիրը բավարար պայմաններ է ստեղծում տարածաշրջանի զարգացման համար և նպաստում է նոր իրողությունների ի հայտ գալուն: 
Այս մասին հայտարարել է Ադրբեջանի արտաքին գործերի նախարար Ջեյհուն Բայրամովը Ռուսաստանի արտգործնախարար Սերգեյ Լավրովի հետ համատեղ մամուլի ասուլիսում, գրում է haqqin.az-ը: 

Բացի այդ, ադրբեջանցի պաշտոնյան շեշտել է՝ Ադրբեջանն ամբողջովին կատարում է նոյեմբերի 10-ին ստորագրված եռակողմ հայտարարության պարտավորությունները:  
«Որպես օրինակ կարելի է նշել ադրբեջանական կողմի կողմից Ղարաբաղ հումանիտար օգնություն մատակարարելու համար պայմանների ստեղծումը: Եռակողմ պայմանավորվածության համաձայն՝ ադրբեջանական կողմի զինվորները ձմեռային պայմաններում նույնպես մասնակցել են պատերազմում զոհված հայ զինծառայողների մարմինների որոնման աշխատանքներին: Ադրբեջանական կողմն օգնություն է ցուցաբերել նաև մահացածներին որոնելու հարցում: Համաձայնագրի կնքումից անմիջապես հետո Ադրբեջանը կատարել է իր պարտավորությունները՝ ապահովելով անվտանգ երթուղի Ադրբեջանի տարածքով: Մենք բարձր ենք գնահատում Ռուսաստանի դերը եռակողմ համաձայնագրի իրագործման գործում: Մեր հիմնական քննարկումները կապված են հաղորդակցությունների ստեղծման հետ: Մենք բարձր ենք գնահատում նաև մշտադիտարկման կենտրոնի ստեղծումը եռակողմ համաձայնագրի հիման վրա»,- ասել է Բայրամովը: 

Բացի այդ, երկրի ԱԳ նախարարը նշել է՝ ադրբեջանական կողմը բարձր է գնահատում տարածքների ականազերծման հարցում ռուսական կողմի նախաձեռնությունները: