Վաղվանից մանկապարտեզներում սահմանափակումները կհանվեն

Առողջապահության նախարարի մայիսի 4-ի N28-Ն հրամանով՝ մանկապարտեզներում ընդունելության, խմբերում երեխաների թվի հետ կապված սահմանափակումները հանվում են: Հրամանն ուժի մեջ կմտնի վաղվանից: 

Նոր հրամանով՝ սահմանված չէ երեխաների թվաքանակի եւ սոցիալական հեռավորության հստակ շեմ: Նշվում է միայն, որ երեխաների խնամքի եւ կրթության գործընթացը կազմակերպվում է՝ ապահովելով խաղալու, պարապմունքների, սննդի և քնի ժամանակ երեխաների միջև սոցիալական հեռավորություն։ Ինչպես նաև ուժը կորցրած է ճանաչվել այն դրույթը, համաձայն որի՝ անհրաժեշտ էր ձեռնպահ մնալ լրացուցիչ ընդունելություն կազմակերպելուց։ 

Արդյունքում ներկայումս նախադպրոցական կրթությունը ընդհատած եւ նախադպրոցական կրթություն ստանալու հնարավորությունից զրկված երեխաները նորից կկարողանան հաճախել մանկապարտեզ: 

Նշենք, որ հակահամաճարակային սահմանափակումների պատճառով նախադպրոցական կրթությունը ընդհատվել է, և մանկապարտեզ չի հաճախում շուրջ 3000 երեխա, իսկ հերթագրվածների թիվը գերազանցում է 12000-ը: 


Հիշեցնենք, որ մինչեւ այժմ գործող կարգով, որը հաստատվել էր կորոնավիրուսի համավարակի պայմաններում, մանկապարտեզներում երեխաների կրթության գործընթացը կազմակերպվում է առավելագույնը 20 երեխայի համար՝ պահպանելով սահմանված 1 մետր հեռավորությունը: Ավելի վաղ գործընթացը կազմակերպվում էր առավելագույնը 18 երեխայի համար՝ պահպանելով 1,5 մետր հեռավորություն, որից հետո որոշակի մեղմացումներ էին եղել: Այնուամենայնիվ, շատ ծնողներ դժգոհում էին երեխաներին մանկապարտեզ տանելու հնարավորություն չունենալուց եւ բողոքի ակցիաներ էին իրականացնում քաղաքապետարանի դիմաց՝ շատ դեպքերում նշելով, որ սահմանված հեռավորությունը ձեւական է: