ՏԵՍԱՆՅՈՒԹ. Հիմա, կառուցվո՞ւմ են, թե՞ չեն կառուցվում. Նիկոլ Փաշինյանի՝ ռուսերենով հերթական վրիպակը
Վարչապետի պաշտոնակատար Նիկոլ Փաշինյանը հերթական անգամ սոցցանցերի քննարկման թեմա է դարձել ռուսերենի իր իմացությամբ։
Երեկ Ռուսաստանի Արտաքին գործերի նախարար Սերգեյ Լավրովի հետ հանդիպան ժամանակ նա իր խոսքում հայտարարել է, որ «մեր երկրների միջև փոխհարաբերությունները դաշնակցային բնույթ են կրում և չեն կառուցվում ռազմավարական գործընկերության սկզբունքի և մեր ժողովուրդների եղբայրական հարաբերությունների վրա»։ Այնինչ վարչապետի պաշտոնակատարի աշխատակազմի տարածած հաղորդագրության մեջ նշված է, որ «կառուցվում են»։
Տեսանյութում երևում է, թե ինչպես են ՀՀ-ում ՌԴ դեսպան Սերգեյ Կոպիրկինը և ՌԴ արտաքին գործերի նախարարության մամուլի քարտուղար Մարիա Զախարովան տարակուսած հայացքներ նետում։
Տեսանյութը՝ ՖԲ իր էջում հրապարակել է Samvel Barseghyan անունով օգտատերը:
Նշենք, որ սա Նիկոլ Փաշինյանը տարբեր ֆորմատներով հանդիպումների ժամանակ և իր ելույթներում ցույց է տվել, որ ռուսերենը այն լեզուն չէ, որին նա գերազանցորեն տիրապետում է, բայց վարչապետի պաշտոնակատարը համառորեն շարունակում է այն օգտագործել։ Ինչպես օրինակ նախորդ օրը ԱԺ-ում, երբ պատասխանելով պատգամավորի հարցին, իր խոսքը ավարտեց ռուսական «Зарубите себе на носу» ասացվածքով։
