Ռուսաստանի պետական լրատվամիջոցներն անտեսում են Ադրբեջանի բողոքը

Ադրբեջանի մեդիադաշտի և սոցցանցերի թիրախում է հայտնվել Ռուսաստանի РИА Новости լրատվական գործակալությունը, որն Արայիկ Հարությունյանին կոչել է Ղարաբաղի նախագահ: 
«Ղարաբաղի նախագահը հայտնեց, որ իրեն որպես վկա հարցաքննել են սահմանադրական կարգը տապալելու գործով»,- գրել է «ՌԻԱ Նովոստին» 
Ադրբեջանի ԶԼՄ-ները և սոցիալական մեդիայի օգտվողները, ովքեր չեն կարողանում հաշտվել Արցախի Հանրապետության գոյության հետ, Հարությունյանին անվանում են «ահաբեկիչների առաջնորդ»: Սակայն լինելով Արցախի ժողովրդի միջնորդի և անվտանգության երաշխավորի խոսափողը՝ ՌԻԱ Նովոստին քաջատեղյակ է իրերի էությանը և չի խեղաթյուրում փաստերը, հայտնում է infoteka24-ը: 
Եթե նախկինում ռուսական կողմը խնայում էր իր ոչ ադեկվատ և ծայրահեղ ագրեսիվ «գործընկերների» զգացմունքները, այժմ հասկացրել է, որ Արցախում ադրբեջանցիների էժանագին սադրանքներն ու Մոսկվայի վրա հարձակումները չափազանց անտեղի են: 

Հիշեցնենք, որ նախորդ օրը Ալիևի քարոզիչներից մեկը փորձել էր խեղաթյուրել եռակողմ հայտարարության տեքստը՝ հայտարարելով, որ Ստեփանակերտն անցնելու է Ադրբեջանի ենթակայության տակ, ռուս խաղաղապահներն էլ դուրս են բերվելու տարածաշրջանից: Այդկերպ նրանք կասկածի տակ են դնում Ռուսաստանի հեղինակությունն ու իմիջը՝ որպես եռակողմ հայտարարության պայմանների պահպանման երաշխավոր: Միաժամանակ Բաքվում անցկացվում են հակառուսական բողոքի ցույցեր թշնամական կարգախոսներով, և ոստիկանությունը որևէ քայլ չի ձեռնարկում նման գործողությունները ցրելու համար: 

Բացի այդ, Ադրբեջանի զինուժը բազմիցս հարձակումներ է կատարում Արցախի գյուղերի ուղղությամբ, այդ թվում և՝ Ստեփանակերտի, ինչը նույնպես դիտվում է խաղաղապահ առաքելությունը խափանելու փորձ: