Փաշինյանը գերեվարված շիրակցի զինծառայողների ծնողների հարազատներին այսօր չի հանդիպի. «Փաստինֆո»

Գերեվարված շիրակցի զինծառայողների ծնողներն ու հարազատները, որոնք այսօր փակել էին Գյումրի-Երևան մայրուղին, վարչապետին չեն հանդիպի: Ավելի վաղ գերիներից մեկի հարազատը նշել էր, որ ճանապարհը կբացեն միայն իրենց հարազատների վերադարձի մասին ստույգ ու սպառիչ տեղեկություն ստանալուց հետո:

Շիրակի մարզից գերիների հարազատները «Փաստինֆո»-ի հետ զրույցում դիմել էին ՀՀ վարչապետին, Պաշպանության նախարարին և Արտաքին գործերի նախարարին, ՌՈ պետին, ԱԺ բոլոր պատգամավորներին՝ շուտափույթ զբաղվել գերիներին վերադարձնելու հարցով։

ԱԺ պատգամավոր Սոֆյա Հովսեփյանն այսօր ՊՆ-ի մոտ լրագրողների հետ զրույցում տեղեկացրեց, որ ամբողջ Շիրակի մարզը պարալիզացված է, գերեվարված զինծառայողների ծնողները պահանջում են հանդիպում՝ Նիկոլ Փաշինյանի հետ, իսկ այժմ նախատեսված է հանդիպում՝ ԱԱԾ տնօրենի հետ։

Գերեվարված զինծառայողների հարազատներից մեկը «Փաստինֆո»-ին տեղեկացրեց, որ Փաշինյանի հետ հանդիպում այսօր չի լինելու, չնայած ավելի վաղ պայմանավորվել էին, որ ապրիլի 9-ին Նիկոլ Փաշինյանն ընդունելու է զինծառայողների հարազատներին։ Նախօրոք պայմանավորված հանդիպման ժամը մի քանի անգամ փոխվել է։

Ըստ տեղեկությունների՝ այսօր 17։00-ից հետո վարչապետը պետք է ընդուներ հարազատներին, սակայն, երբ զինծառայողների հարազատները արհամարհական վերաբերմունքի են արժանացել, առավոտյան Շիրակի մարզ տանող ճանապարհներն են փակել՝ պահանջելով, որ վարչապետը մեկնի Շիրակ ու այնտեղ տեղի ունենա հանդիպումը։