Ինձ թույլ չտվեցի իմ իմացած տեղեկությունը, որը դեռևս հաստատված չէր, լայնորեն PR անել. Զոհրաբյան
Մենք բոլորս էլ տարբեր աղբյուրներով տեղեկություն ունեինք, որ առաջիկա օրեին 20-22 ռազմագերի է վերադառնալու, բայց ես ինձ թույլ չտվեցի իմ իմացած տեղեկությունը, որը դեռևս հաստատված չէր, լայնորեն PR անել, ինչպես դա անում էին իմքայլական պատգամավորները: Այս մասին լրագրողների հետ ճեպազրույցում ասաց ԲՀԿ պատգամավոր Նաիրա Զոհրաբյանը:
«Զարհուրելին այն է, երբ ես գիտեմ, որ որոշ ծնողների ասել էին՝ եղեք օդանավակայանում, ծնողներն էլ հագուստով քաղցրավենիքով եկել էին օդանավակայան, մարդիկ տներում ուրախության սեղաններ էին գցել, իսկ ինքնաթիռը գալիս է դատարկ: Ուզում եք ինձ համոզել, որ որևէ մեկը չգիտեր, որ պայմանավորվածությո՞ւն է խախտվելու: Սա դեռ երկար վերլուծելու խնդիր է, թե ինչո՞ւ գերիները չվերադարձվեցին: Ես կարծում եմ, որ եթե պետությանդ հարգում են, գոնե պետք է ասեին՝ մի՛ թռեք, խնդիրներ են առաջացել, բայց ինքնաթիռը գալիս է դատարկ »,-ասաց Զոհրաբյանը:
Պատգամավորն ընդգծեց, որ սա ևս մեկ անգամ ապացույց է, որ պարտված ղեկավարը չի կարող խնդիր լուծել և հաղթահարել պատերազմի հետևանքները:
Նաիրա Զոհրաբյանի խոսքով՝ տարբեր պատգամավորներ, այդ թվում ՝ ԱԺ կին փոխխոսնակը երբ խոսում է խաղասիրության մասին, իսկ միևնույն ժամանակ Բաքվի ռազմաարդյունաբերական գործարանում արտադրում են «Իթի գովան» անվամբ ԱԹՍ, ինչը թարգմանաբար նշանակում է սատկացնել շան նման։
ԲՀԿ պատգամավորը, դիմելով փոխվարչապետ Տիգրան Ավինյանին, հարցրեց. «Դուք գիտեի՞ք, որ ինքնաթիռը, որը գնում է Բաքու վերադառնալու է դատարկ: Եթե չգիտեիք, ապա ի՞նչ եք անում ձեր պաշտոնում։ Ի պաշտոնե, դուք պարտավոր էիքայդ ամենի մասին տեղյակ լինեիք։ Եթե չգիտեիք, հենց հիմա դուք պետք է հրաժարականի դիմում տաք և հեռանաք»:
