«Ռուսաստանը պատրաստ չէ լսել ՌԴ-ում ցույցերի վերաբերյալ ամերիկյան ներկայացուցիչների հայտարարությունները».Պեսկով
Ռուսաստանի Դաշնության նախագահի մամուլի քարտուղար Դմիտրի Պեսկովը հայտարարել է, որ Ռուսաստանը պատրաստ չէ ընդունել երկրում ապօրինի գործողությունների վերաբերյալ ամերիկյան ներկայացուցիչների հայտարարությունները, հայտնում է «ՌԻԱ Նովոստի» լրատվական գործակալությունը:
Նախօրեին ամերիկյան դիվանագիտական առաքելության մամուլի քարտուղար Ռեբեկա Ռոսը հայտնել էր, որ Միացյալ Նահանգները կոչ է անում Մոսկվային կատարել միջազգային պարտավորությունները` Ռուսաստանի քաղաքներում տեղի ունեցած բողոքի ակցիաների նախօրեին և դրանց ընթացքում իրականացված ձերբակալությունների կապակցությամբ: Բացի այդ, լրագրողների ձերբակալությունների մասին հաղորդագրությունների ֆոնին, ամերիկյան դիվանագիտական առաքելությունն իր թվիթերյան օգտահաշվում Ռուսաստանի իշխանություններին կոչ է արել «հարգել մամուլի ազատությունը»:
«Ինչ վերաբերում է մեր երկրի վերաբերյալ և մեր երկրում տեղի ունեցած անօրինական գործողությունների վերաբերյալ ամերիկյան ներկայացուցիչների հայտարարություններին, մեկ անգամ ևս կրկնում եմ, որ մենք պատրաստ չենք ընկալել և լսել ամերիկացիների հայտարարությունները», - ասել է Պեսկովը:
Ավելի վաղ Ռուսաստանի Արտաքին գործերի նախարարությունը Ալեքսեյ Նավալնիի հետ կապված իրավիճակը մեկնաբանող օտարերկրյա քաղաքական գործիչներին խորհուրդ էր տվել հարգել միջազգային իրավունքը և զբաղվել իրենց երկրների խնդիրներով, մինչդեռ Ռուսաստանի արտգործնախարար Սերգեյ Լավրովը նշել է, որ այս թեմայով արևմտյան քաղաքական գործիչների հայտարարությունները կարծես կրկնօրինակներ լինեն:
