Մարդկությունը հայտնվել է «աղետալի բարոյական ձախողման» եզրին. ԱՀԿ
Մարդկությունը հայտնվել է «աղետալի բարոյական ձախողման» շեմին կորոնավիրուսի դեմ պատվաստանյութի ոչ ճիշտ բաշխման հետևանքով: Ինչպես փոխանցում է РБК-ն, նման հայտարարությամբ հանդես է եկել Առողջապահության համաշխարհային կազմակերպության ղեկավար Թեդրոս Ադհանոմ Գեբրեյեսուսն այսօր կայացած ասուլիսում:
«Պետք է անկեղծ լինեմ. աշխարհը կանգնած է աղետալի բարոյական ձախողման շեմին: Եվ այդ ձախողման գինը վճարվում է կյանքերով և գոյատևման միջոցներով աշխարհի ամենաաղքատ երկրներում»,- ասել է Գեբրեյեսուսը:
Վերջինս ընդգծել է, որ կորոնավիրուսի դեմ պատվաստանյութերը, որոնք կարող են փրկություն դառնալ շատերի համար, կարող են նաև ևս մեկ «աղյուս դառնալ անհավասարության պատում», որը բաժանում է մարդկանց:
«Պատվաստանյութի ավելի քան 39 մլն չափաբաժին տարածվել է առավել բարձր եկամուտ ունեցող առնվազն 49 երկրում: Եվ միայն 25 չափաբաժին է հասել ամենացածր եկամուտ ունեցող երկրին: Ոչ թե 25 մլն, ոչ թե 25 հազար, այլ 25»,- ընդգծել է ԱՀԿ ղեկավարը:
«Պատվաստանյութը կբավականացնի բոլորին, սակայն հիմա մենք պետք է միասին աշխատենք ինչպես մեկ համաշխարհային ընտանիք, որպեսզի առաջնահերթ ուշադրություն դարձնենք նրանց, ովքեր կանգնած են ծանր հիվանդության և մահանալու վտանգի առաջ»,- հավելել է մասնագետը:
Ողջ աշխարհում կորոնավիրուսով վարակվածների թիվը գերազանցել է 95 մլն-ը, իսկ մահացածներինը՝ 2 մլն-ը:
