ՏԵՍԱՆՅՈՒԹ. Անհետ կորած զինծառայողների ծնողները պատնեշներ հաղթահարելով մտել են ՊՆ բակ
Այսօր էլ ՊՆ-ում վաղ առավոտից հավաքվել է անհետ կորած համարվող զինծառայողների ծնողների և հարազատների մեկ այլ խումբ: Նրանք ցանկանում են անհապաղ հանդիպել պաշտպանության նախարարին: Ծնողները շրջանառվող լուրերից, տեսանյութերից տեղեկացվել են, որ երեկ հայ զինծառայողների շրջանում կան նոր գերեվարվածներ: Նշում են, որ ողջ գիշեր չեն կարողացել հանգիստ լինել և այսօր կմնան նախարարությունում այնքան, մինչև չձեռնարկվեն գործուն քայլեր՝ իրենց որդիների հայտնաբերման ուղղությամբ:
Ծնողները, չսպասելով որևէ հրավերի, ճեղքել են պատնեշները, մտել ՊՆ բակ: Լրատվամիջոցներն այդ ամենին հետևում են հեռվից, քանի որ արգելել են նախարարությունում նկարահանում իրականացնել: Հիմա էլ ծնողները ցանկանում են ճեղքել շենք տանող գլխավոր մուտքը։
Հիշեցնենք, որ երեկ ԳՇ պետ Օնիկ Գասպարյանը ընդունել էր Էջմիածնի զորամասերից մեկից մարտական գործողությունների մեկնած և անհետ կորած 40 զինծառայողների 3 ծնողների և վստահեցրել, որ որոնողական աշխատանքները շարունակվում են, և արդյունքների մասին ամեն օր կիրազեկեն ծնողներին:
