ՌԴ քաղաքացուն մահացած են հայտնաբերել Անկարայում

Ռուսաստանի քաղաքացի Վերա Չիկարևային մահացած են հայտնաբերել թուրքական մայրաքաղաքի Չանկայա թաղամասում: Այս մասին հայտնում է ТАСС գործակալությունը՝ հղում անելով թուրքական ոստիկանությանը:

Նախաքննությունը պարզել է, որ մահվան պատճառ կարող էր դառնալ անզգուշաբար ընկնելը: Նշվում է, որ կինը, գտնվելով ոգելից խմչքի ազդեցության տակ, բարձրացել է մահճակալից, կորցրել հավասարակշռությունն ու ընկնելիս գլխով հարվածել մարմարե պատուհանագոգին: Քննիչներն ուսումնասիրել են տան արտաքին տարածքի վերահսկման տեսախցիկների տեսագրությունները, որտեղ բնակվելիս է եղել 35-ամյա ռուս կինը: Ըստ տեսագրության կադրերի՝ Չիկարևան բնակարան է մտել նոյեմբերի 30-ին և այդ օրվանից չի հեռացել այնտեղից: Նրան այցելողներ ևս չեն եղել: Մուտքի դուռը փակված է եղել ներսից:   

Ներկա պահին սպանության վարկած չի դիտարկվում: Սակայն կատարվածում քրեական հետքի առկայության մասին պարզ կդառնա կնոջ մարմնի դատաբժշկական փորձաքննության ավարտին:  

Թուրքական Sabah պարբերականի հաղորդմամբ՝ Չիկարևան երկու ամիս առաջ ապահարզանի դիմում էր ներկայացրել՝ ցանկանալով ամուսնալուծվել 41-ամյա Սալիհ Գ-ից, որը Թուրքիայի քաղաքացի է: Ըստ դիմումի՝ ամուսինը նրա նկատմամբ բռնություն էր կիրառում և սպառնում էր վրեժ լուծել: Աղբյուրը նաև լուսանկարներ էր հրապարակել, որոնցում երևում էին բռնության հետքերը կնոջ մարմնի և դեմքի վրա: Թուրքիայի քաղաքացուն կանչել են հարցաքննության:

Նշվում է, որ տանը ստուգումներ կատարելիս ոստիկանները մեծ քանակությամբ ոգելից խմիչքի շշեր են հայտնաբերել: