ՏԵՍԱՆՅՈՒԹ. Բուլղարահայերը բողոքի ցույց են կազմակերպել Սոֆիայում՝ Եվրահանձնաժողովի շենքից երթով հասնելով երկրի խորհրդարանի մոտ

Բուլղարիայի հայ համայնքի ներկայացուցիչները բողոքի ցույց են կազմակերպել մայրաքաղաք Սոֆիայում: Նրանք հավաք են կազմակերպել Եվրահանձնաժողովի շենքի դիմաց՝ պահանջելով աջակցել ահաբեկչության և բռնության դադարեցմանը:

Ցույցի տեսանյութը հրապարակվել է Հայկական բարեգործական ընդհանուր միության (ՀԲԸՄ) բուլղարական գրասենյակի ֆեյսբուքյան էջում: Ցույցի մասնակիցները նաև երթով հասել են երկրի խորհրդարանի մոտ՝ բացականչելով «Խաղաղություն Հայաստանի համար», «Խաղաղություն Արցախի համար», «Կանգնեցրեք ահաբեկչությունը», «Էրդողանն ահաբեկիչ է» և այլ վանկարկումներ:

Նրանք նաև համապատասխան պաստառներ են ցուցադրել՝ «Ձեր լռությունը սպանում է հայերին», «Կանգնեցրեք պատերազմը» գրություններով:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 11-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 525 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։