Մոտավորապես 60 զինծառայողի կորուստներ և զգալի թվով զրահատեխնիկայի կորուստներ հետ է շպրտվել. Հովհաննիսյան

Արցախի սահմանին ամբողջ գիշեր ընթացել են համառ մարտեր։ Այս մասին այսօր հայտնեց ՊՆ ներկայացուցիչ Արծրուն Հովհաննիսյանը։ 

«Հակառակորդը զրահատեխնիկայի, ԱԹՍ-ների, հրետանու հուժկու կրակի տակ փորձել է նորից հարձակումներ իրականացնել հատկապես հուսիսային և հարավային ուղղություններով՝ կրելով մեծ կորուստներ, մոտավորապես 60 զինծառայողի կորուստներ և զգալի թվով զրահատեխնիկայի կորուստներ հետ է շպրտվել։ Այս պահին մարտերը շարունակվում են։ 

Պետք է ասեմ, որ դեռ երեկ Հայաստանի Հանրապետության տարածքը ենթարկվել էր ադրբեջանական զինված ուժերի գործողություններին և հատկապես այսօր Վարդենիսի ուղղությամբ ադրբեջանական ԱԹՍ-ները և օդուժը հարված է հասցրել։ ԱԹՍ-ները հարված են հասցրել նաև խաղաղ բնակիչներին, մենք րոպեներ առաջ հրապարակեցինք նյութեր, թե ինչպես է այրվում քաղաքացիական ավտոբուսը։ Օդուժ է կիրառվել մարտական դիրքերի ուղղությամբ՝ հայկական զինված ուժերի։ Այս պահին այս ուղղությամբ կորուստներ չունենք և ինչպես նշեց Պաշտպանության նախարարությունը սպասեք հուժկու պատասխանի։ Իրավիճակը արագ է փոփոխվում, րոպեների ընթացքում կարող են հայտնվել նոր լուրեր, շուտով ՊԲ-ն ևս կհաղորդի ավելի մանրամասն գիշերային մարտերի մանրամասները»,- ասաց Հովհաննիսյանը։