«Արցախ-Հայաստան հարաբերությունները, հատկապես անվտանգության ոլորտում պետք է ամրագրվեն և դրանց պետք է նոր որակ հաղորդվի»,-ճեպազրույցի ժամանակ ասաց Արցախի արտաքին գերատեսչության ղեկավար Մասիս Մայիլյանը։ Սակայն, նրա խոսքով, շատ ավելի կարևոր է Արցախի միջազգային ճանաչումը որպես քաղաքական և դիվանագիտական լծակ, որը կարող է զսպել Ադրբեջանին։

Նախարարը նշեց, որ այս պահին պետք է քայլեր կատարվեն ռազմակական գործողությունները կանգնեցնելու ուղղությամբ։ «Այդպիսի քայլեր արվում են։ Մեր ՊԲ-ն լավագույնս աշխատում է Ադրբեջանին զսպելու ուղղությամբ։ Այնուհետև Ադրբեջանին միջազգային կառույցների օգնությամբ պետք է կարողանանք բերել կառուցողական դաշտ և արդեն քննարկումներ սկսել։ Այդ քննարկումները եղել են մինչև տավուշյան դեպքերը և Ադրբեջանի ագրեսիայի պատճառով շատ մեծ հարված է հասցվել այդ խաղաղ գործընթացին։

Հիմա այս իրավիճակը ևս հարված է։ Ադրբեջանը նման քայլերով վնաս է հասցնում խաղաղ գործընթացին»,-ասաց նա։