Գագիկ Ծառուկյանին կալանավորելու հարցով դատական նիստը չկայացավ

ԲՀԿ առաջնորդ Գագիկ Ծառուկյանի կալանքի հարցով դատական նիստը (նախագահ՝ Մնացական Մարտիրոսյան) այսօր տեղի չունեցավ:  Դատարան չէին ներկայացել ո՛չ պաշտպաները, ո՛չ էլ մեղադրյալը: Ոչ պաշտոնական տեղեկությունների համաձայն՝ պաշտպանական կողմը  պատշաճ ծանուցված չի եղել: Այդ տեղեկությունը ճշտելու՝ մեր նկարահանող խմբի բոլոր փորձերն անցել են ապարդյուն։ Ո՛չ Դատական դեպարտամենտը, ո՛չ Ծառուկյանի պաշտպանները չեն պատասխանել հեռախոսազանգերին, իսկ դատավորի աշխատակազմից  պատասխանեցին, թե իրավասու չեն որևէ ինֆորմացիա տրամադրել: 
Հիշեցնենք՝  ՀՀ Վերաքննիչ քրեական դատարանը հուլիսի 8-ին՝ դատավոր Մխիթար Պապոյանի նախագահությամբ, բեկանել էր  Գագիկ Ծառուկյանին չկալանավորելու մասին առաջին ատյանի դատարանի որոշումն ու այն հետ ուղարկել՝ նոր քննության։ Ծառուկյանը մեղադրվում է ՀՀ ՔՕ 154.2 հոդվածով՝ ընտրողի կողմից թեկնածուներից, կուսակցություններից, կուսակցությունների դաշինքներից, կաշառք ստանալու կամ ընտրողներին կաշառք տալու, ընտրողի ազատ կամքի իրականացմանը խոչընդոտելու հատկանիշներով: