Սահակաշվիլին խոստացել է Ռուսաստանի հետ առճակատման մեջ չմտնել
Վրաստանի նախկին նախագահ Միխեյիլ Սահակաշվիլին, ով նախատեսում է վերադառնալ հայրենիք ու գալ իշխանության, խոստացել է, որ Ռուսաստանի հետ առճակատման մեջ չի մտնի: «Հիմա կարևոր է երկիրը ճահճից դուրս հանել, և ոչ մեկի հետ կոնֆլիկտ չստեղծել։ Մեր խնդիրը Ռուսաստանի հետ առճակատման մեջ մտնելը չէ, այլ ներքին խնդիրները ճիշտ լուծելը», - ասել է նա «Ֆորմուլա» հեռուստաընկերության եթերում: Սահակաշվիլին ավելի վաղ ասել էր, որ վերադառնում է Վրաստան: Նա խոստովանել էր, որ իր նախագահության ընթացքում թույլ են տրվել բազմաթիվ սխալներ, բայց այժմ նա ձեռք է բերել բավարար փորձ՝ համարժեքորեն «ծառայելու իր երկրին»: Ըստ նրա՝ երկու տարին բավարար է «Վրաստանը ճահճից դուրս բերելու համար»:
Վրաստանի իշխանությունների մի շարք ներկայացուցիչներ Սահակաշվիլիի հայտարարությունը համարեցին հերթական սուտը։ Երկրի արդարադատության նախարար Թեյա Ցուլուկիանին խոստացավ, որ նրան անմիջապես կձերբակալեն սահմանային անցակետում:
