Երկու տարի շարունակ ԱԱԾ-ում տեղեկատվական արտահոսք է եղել. Սեդա Սաֆարյան

Մարտի 1-ի գործով տուժողների իրավահաջորդների ներկայացուցիչներն այսօր մամուլի ասուլիս էին հրավիրել։ Փաստաբան Տիգրան Եգորյանը հայտարարեց, որ իրենց կարևորագույն անելիքն այս պահին խնդիրները բարձրացնելն է. ««Մարտի 1-ի գործով Դատախազությունը չէր դրսևորում բավարար կամք, և շատ մարդկանց հնարավորություն էր տրվում խուսափելու պատասխանատվությունից։

Վերջին 20 տարիների ընթացքում իշխանության ամբողջատիրական ձևավորումը և իրականացումը դադարեցված 2018 թվականի իրադարձություններից հետո, կարծես թե, մեկնարկեցին գործընթացներ, որոնք ի թիվս այլ խնդիրների, պետք է լուծեին նաև կոռումպացված և տարիներ շարունակ ժողովրդավարության և մարդու իրավունքների դեմ ի նպաստ խմբային շահերի գործադրված պետական համակարգի, այդ թվում նաև դատական համակարգի խնդիրները։ Կարճ ժամանակ անց պարզվեց, որ իշխանությունն անկարող է իրականացնել բովանդակալից և հետևողական իրավական քաղաքականություն, այդ անկարողությունը դրսևորվում էր իրավական համակարգի խորքային, համակարգված և հետևողական բարեփոխման իրական ծրագրի և դրա իրագործման բացակայությամբ»։

Փաստաբան Սեդա Սաֆարյանն էլ ավելացրեց, որ բավականին լուրջ օպերատիվ տվյալներ կան, որոնց իրացման հարցում դժվարություններ կան. «Դրանք վերաբերում են սպանություններին, օլիգարխիկ համակարգի թիկնազորերի մասնակցությունն այդ սպանություններին և այս կապակցությամբ ևս օպերատիվ աշխատանք չի տարվում։ Փորձ է արվել պետական մակարդակով ուղղել, բայց որևէ մեկի փոփոխությունը դեռ չի նշանակում կադրային փոփոխություն, այն օղակները, որ պետք է զբաղվեին դրանով, չեն ցանկանում զբաղվել՝ հայտնի պատճառներով: Ես տեղյակ եմ, որ օպերատիվ տվյալների իրացման գործընթացում երկու տարի շարունակ Ազգային անվտանգությունում տեղեկատվական արտահոսք է եղել և դրանք շատ բացասաբար են ազդել ՀՔԾ-ի աշխատանքի վրա։ Փորձ է արվել պետական մակարդակով ուղղել այն, բայց որևէ մեկի փոփոխությունը չի նշանակում կադրային փոփոխություն, այն օղակները, որոնք պետք է դրանով զբաղվեն, չեն ցանկանում դրանով զբաղվել, մենք գիտենք, թե ինչ պատճառով։ Եթե այսօր Վանեցյանը ցանկանում է քաղաքական ինտրիգներով զբաղվել, ապա արդեն իսկ ամեն ինչ ակնառու է։ Պատկերացնում եք այս մարդու երկու տարվա համագործակցությունը ՀՔԾ-ի հետ, համագործակցության մեխանիզմը և ցանկության բացակայությունը, որի արդյունքում տեղեկատվական արտահոսք է եղել»։

Մարտի 1-ի զոհ Գոռ Քլոյանի հայրը՝ Սարգիս Քլոյանն էլ ավելացրեց, որ շատ վրդովված են, դադարեցնում են իրենց մասնակցությունն այս անբովանդակ միջոցառմանը և կտեսնեն, թե որն է լինելու իրենց հետագա քայլերը։ Մարտի 1-ի գործով իրավահաջորդ Արմեն Ֆարմանյանն ու Էդիկ Հարությունյանը ևս հայտնեցին, որ չեն մասնակցի նիստերին: