Միասնության քայլերթ. Բելառուսում հակակառավարական ցույցերի մեկնարկը տրվել է

Մինսկի կենտրոնում ընթանում է նախագահ Ալեքսանդր Լուկաշենկոյի հակառակորդների ավանդական լայնածավալ երթը, որը նրանք կազմակերպում են կիրակի օրերին: Ոստիկանությունը պատնեշներ է տեղադրել Մինսկի կենտրոնում գտնվող հրապարակի շուրջ, որտեղ  ընդդիմության չարտոնված երթն է ընթանում:  
Մասնավորապես, այս հրապարակում են գտնվում Հանրապետության պալատը, ինչպես նաև արհմիությունների տունը, իսկ մի փոքր այն կողմ`Հանրապետության նախագահի վարչակազմի նստավայրը: 
Մեքենաների տեղաշարժը Անկախության պողոտայով, որը անցնում է Հոկտեմբերյան հրապարակով, իրականացվում է առանց սահմանափակումների, գործում են մետրոյի բոլոր կայարանները: Բելառուսի նախագահի թեկնածու Սվետլանա Տիխանովսկայան նոր տեսաուղերձով է հանդես եկել՝ կոչ անելով բելառուսցիներին մասնակցել Միասնության քայլերթին։ 
Հիշեցնեմ, որ բողոքի ցույցերը Բելառուսում չեն դադարում օգոստոսի 9-ին կայացած նախագահական ընտրություններից ի վեր. ընդդիմադիրներն ու նրանց կողմնակիցներն ամեն օր փողոց են դուրս գալիս՝ բողոքելով ընտրությունների արդյունքներից, որոնց համաձայն՝ հաղթող է ճանաչվել երկրի գործող նախագահ Ալեքսանդր Լուկաշենկոն: