Մինսկում սկսվել է ընդդիմության կողմնակիցների հանրահավաքը

Բելառուսական ընդդիմության հարյուրավոր կողմնակիցներ, չնայած անձրևային եղանակին, դարձյալ հավաքվել են Մինսկի Անկախության հրապարակում:

Ինչպես հաղորդում է РИА Новости-ն, երեք ոստիկան է մոտեցել հանրահավաքի մասնակիցներին, որոնց մոտ ընդդիմության խորհրդանիշ սպիտակ-կարմիր-սպիտակ դրոշներ կան: Իրավապահները տեսագրում են նրանց զրույցը: Ցուցարարներն էլ ընդդիմադիր կարգախոսներ են հնչեցնում և երգեր երգում:

Ոստիկանությունն ակտիվ գործողություններ չի ձեռնարկում: Հիշեցնենք, որ մի քանի հարյուր մասնակից ունեցող հանրահավաք հրապարակում նախօրեին էլ է տեղի ունեցել, որն անցել է առանց միջադեպերի և բախումների:

Բողոքի ցույցերն ու ընդդիմադիրների կողմնակիցների հանրահավաքները Մինսկում և Բելառուսի այլ քաղաքներում շարունակվում են օգոստոսի 9-ին երկրում կայացած նախագահական ընտրություններից հետո, որոնց արդյունքներով՝ հաղթել է գործող նախագահ Ալեքսանդր Լուկաշենկոն՝ ստանալով ընտրողների ձայների 80 տոկոսը: