Նեթանյահուի ցեղասպանական կառավարությունը գործում է ամբողջ աշխարհի աչքի առաջ․ Էրդողան

Թուրքիայի նախագահ Ռեջեփ Թայիփ Էրդողանը «Նեթանյահուի ցեղասպանական կառավարությանը» մեղադրել է օկուպացված Հորդանան գետի Արևմտյան ափին և Արևելյան Երուսաղեմում անօրինական քայլերը շարունակելու մեջ։

«Ամբողջ աշխարհի աչքի առաջ շարունակվում են Նեթանյահուի ցեղասպանական կառավարության անօրինական գործողությունները օկուպացված Արևմտյան ափին և օկուպացված Արևելյան Երուսաղեմում։ Ինքնիշխան պաղեստինյան պետության գոյությունը խաթարվում է։ Անհնար է դա անտեսել կամ դրա նկատմամբ անտարբեր մնալ»,- Անկարայում Պաղեստինի ղեկավար Մահմուդ Աբբասի հետ համատեղ ասուլիսի ընթացքում ընդգծել է Էրդողանը։

Թուրքիայի ղեկավարը կոչ է արել հնարավորինս շուտ ապահովել անհրաժեշտ պայմաններ Գազայի հատվածի վերականգնումը նախաձեռնելու, ինչպես նաև անկլավում անվտանգային միջավայր ձևավորելու համար։

«Ես կրկին ուզում եմ ընդգծել, որ Պաղեստինին աջակցելն ամբողջ մարդկության, հատկապես մահմեդական աշխարհի, ընդհանուր պատասխանատվությունն է»,- նշել է Էրդողանը։

Նա հավելել է, որ Թուրքիան կշարունակի «վճռականորեն պաշտպանել պաղեստինյան գործը բոլոր հարթակներում»։

Էրդողանը նաև փաստել է, որ Անկարան անվերապահորեն մերժում է ցանկացած սադրիչ քայլ, որը նպատակ ունի փոխել Ալ-Աքսա մզկիթի և մյուս սրբավայրերի շուրջ առկա իրավիճակը։

Նա հավաստիացրել է, որ Թուրքիան կշարունակի հետամուտ լինել 1967 թվականի սահմաններում՝ Արևելյան Երուսաղեմ մայրաքաղաքով անկախ ու տարածքային ամբողջականություն ունեցող պաղեստինյան պետության ձևավորմանը։