Երկրին փոփոխություններ են հարկավոր, բայց ոչ քաղաքացիական դիմակայության կամ հեղափոխությունների գնով. Բելառուսի ԱԳՆ
Բելառուսի արտգործնախարար Վլադիմիր Մակեյը հայտարարել է, որ երկրում փոփոխություններ պետք են, բայց դրանք չպետք է իրականացվեն քաղաքացիական դիմակայության կամ հեղափոխությունների գնով, գրում է ria.ru-ն։
«Փոփոխություններ պետք են, դա ոչ ոք չի հերքում։ Բայց ոչ քաղաքացիական դիմակայության կամ հեղափոխությունների գնով։ Այդ դեպքում զոհերն ու բացասական հետևանքները մի քանի անգամ ավելի շատ կլինեն։ Վերջին օրերի իրադարձությունների պատճառով մենք արդեն իսկ երկար տարիներ հետ ենք շպրտվել մեր զարգացումից»,- ասված է Մակեյի հայտարարության մեջ, որը հրապարակվել է հանրապետության ԱԳՆ կայքում:
Հիշեցնենք, որ Բելառուսում օգոստոսի 9-ին տեղի ունեցած նախագահական ընտրություններից հետո, որում 80 տոկոս ձայնով հաղթանակ տարավ գործող նախագահ Ալեքսանդր Լուկաշենկոն, շարունակվում են բողոքի ցույցերն ու գործադուլները:
Առաջին օրերին ուժայիններն ակտիվիստների դեմ ուժ ու հատուկ միջոցներ էին կիրառել։ Պաշտոնական տվյալներով՝ ձերբակալվել է մոտ 7 հազար մարդ։ Ինչպես հաղորդել է Ներքին գործերի նախարարությունը, անկարգությունների ժամանակ տուժել են հարյուրավոր մարդիկ։
Պաշտոնապես հաստատվել է երեք մարդու մահը։
