Զարթոնք համայնքում միջադեպի հետևանքով 4 ձերբակալվածներից մեկը համայնքի ղեկավարի տեղակալն է. NEWS. am
Հուլիսի 27-ին Զարթոնք համայնքում տեղի ունեցած միջադեպի հետևանքով 4 ձերբակալվածներից մեկը համայնքի ղեկավարի տեղակալ Սուրեն Պողոսյանն է։ Այս մասին NEWS.am-ի հետ զրույցում համայնքի ղեկավար Սամվել Աղաջանյանը։
«Ձերբակալվել է նաև պարոն Պողոսյանի հարազատը, Հովհաննես Հովսեփյանն ու Զարզանդ Բաղչագուլյանը»,- ասաց Սամվել Աղաջանյանը՝ հավելելով, որ վերջին երկուսը նախկին գյուղապետի համախոհներն են։
Զարթոնքի 4 բնակիչները ձերբակալվել են 72 ժամով։ Վաղը լրանալու է ժամկետը։
«Փաստաբաններն այդ գործով են զբաղվում»,- ասաց համայնքի ղեկավարը։
Նա հավելեց, որ այս պահին համայնքում վիճակը հանգիստ է։
Հիշեցնենք, որ հուլիսի 27-ին, Զարթոնքում համայնքի նախկին ղեկավարի, նրա համախոհների և ներկա ղեկավարի տեղակալ Սուրեն Պողոսյանի և վերջինիս համախոհների մասնակցությամբ միջադեպ էր գրանցվել։ Սուրեն Պողոսյանը լրատվամիջոցի հետ զրույցում ասել էր, որ ինքն ու իր համախոհները տարբեր վնասվածքներով տեղափոխվել են հիվանդանոց, ավելի ուշ դուրս գրվել։
Դեպքի առթիվ ՀՀ ոստիկանությունում հարուցվել է քրեական գործ՝ ՀՀ քրեական օրենսգրքի 258-րդ հոդվածի (խուլիգանություն) 4-րդ մասի հատկանիշներով, որի նախաքննությունն իրականացվում է ՀՀ քննչական կոմիտեի Արմավիրի մարզային քննչական վարչությունում: Քրեական գործով կատարված քննչական եւ դատավարական այլ գործողությունների, ինչպես նաեւ՝ օպերատիվ-հետախուզական միջոցառումների արդյունքում Զարթոնք գյուղի 4 բնակիչ ձերբակալվել է: Նախաքննությունը շարունակվում է:
