Տավուշի մարզի Բերդ համայնքում կգործի «Թումո» կենտրոն. կառավարության որոշումը

Տարածքային կառավարման և ենթակառուցվածքների նախարար Սուրեն Պապիկյանը կառավարության նիստի ընթացքում ներկայացրեց «Հողամաս հետ վերցնելու և անհատույց օգտագործման իրավունքով հանձնելու մասին» կառավարության որոշման նախագիծը:

«Սիմոնյան» կրթական հիմնադրամը համապատասխան գրություններով դիմել է ՀՀ ԿԳՄՍ նախարարություն և ՏԿԵ պետական գույքի կառավարման կոմիտե՝ Բերդի ավագ դպրոցին անհատույց օգտագործման իրավունքով հանձնված անշարժ գույքից մի հատվածը «Թումո» շարժական կենտրոն կառուցելու նպատակով հիմանդրամին անհատույց օգտագործման իրավունքով տրամադրելու հարցով: ԿԳՄՍ նախարար Արայիկ Հարությունյանն էլ նշեց, որ դա կարևոր նախաձեռնություն է:

«Այս նախագծի շրջանակներում շարժական կենտրոնների միջոցով «Թումո»-ն իրականացնելու է դասընթացների այն հատվածը, որ հիմնական կենտրոններում է իրականացվում, բացի այդ, նախարարության հետ նախնական քննարկումների արդյունքում պայմանավորվել ենք, որ այդ տարածքները կարող են տրամադրվել նաև ուսուցիչների վերապատրաստման համար»,-ասաց Հարությունյանը: