Վթարված շտապօգնության մեքենայի վարորդը ունի բազմաբեկոր կոտրվածք

Երևանի պետական բժշկական համալսարանի աշխատակազմի ղեկավար Շուշան Դանիելյանը մանրամասներ է ներկայացրել քիչ առաջ կողաշրջված շտապօգնության մեքենայում գտնված աշխատակիցների վիճակից:

Նա նշել է, որ շտապ օգնության 3 աշխատակիցները՝ բժիշկը, բուժքույրը և վարորդը տեղափոխվել են թիվ 1 համալսարանական հիվանդանոց։

«Ներկա պահին տուժածները գտնվում են հետազոտման փուլում։

Վարորդի վիճակը գնահատավում է միջին ծանրության՝ ունի աջ վերին վերջույթի բազմաբեկոր կոտրվածք, բժշկի վիճակը գնահատվում է բավարար, իսկ բուժքրոջ վիճակը՝ կայուն՝ միջին ծանրության»,- ֆեյսբուքյան գրառում է արել Դանիելյանը եւ նշել, որ ներկա պահին տուժածների կյանքին վտանգ չի սպառնում։