Կառավարությունը թույլատրել է 200 տոննա սիգի արդյունագործական որս իրականացնել

Սևանա լճում գործում է կենսաբանական մաքրման 17 կայան, իսկ ահա ափամերձ տարածքներում ունենք մոտ 300 oբյեկտ, լրագրողների հետ հանդիպման ժամանակ ասաց Շրջակա միջավայրի նախարարության Բնության հատուկ պահպանվող տարածքների և կենսաբազմազանության քաղաքականության վարչության պետի ժամանակավոր պաշտոնակատար Ոսկեհատ Գրիգորյանը։

Ասուլիսին ներկա Շրջակա միջավայրի նախարարի ժամանակավոր պաշտոնակատր Վահե Ջիլավյանն իր հերթին անդրադարձավ Սևանա լճում սիգի պաշարների հարցին:

«Կառավարության որոշմամբ արդեն իսկ նախաձեռնել ենք այս տարվա առաջին արդյունագործական որսը:Թույլատրել ենք 200 տոննա սիգի որս իրականացնել: Շուրջ 150 դիմում ունենք, մոտակա 10 օրվա ընթացքում պայմանագրերը կկնքվեն: Որևէ այլ ձկնատեսակի համար օրինական որս չի թույլատրվել», - ասաց բանախոսը: