Բրազիլիայում ավտովարորդները հրաշքով խուսափել են ինքնաթիռի հետ բախումից
Բրազիլիայում ինքնաթիռի վաճառքի համար նախատեսված «թեստ-դրայվի» ժամանակ ինքնաթիռը խափանվել է։ Դրա շարժիչն ուղղակի հանգել է, երբ ինքնաթիռը 300 մետր բարձրության վրա է եղել։ Արդյունքում` փոքր ինքնաթիռը սկսել է ընկնել։ Անկման տեսանյութը հրապարակվել է Daily Mail կայքում։
Անկման ժամանակ այն կառչել է փողոցի երկայնքով տարածվող էլեկտրալարերից ու ընկել հենց փողոցի վրա, երբ այդտեղով անցնում էին մեքենաներ։ Բարեբախտաբար, ինքնաթիռն ընկել է մեքենաների միջև, ու հնարավոր է եղել խուսափել նրա մասնակցությամբ «ավտովթարից»։
Ինքնաթիռի օդաչուն և գնորդը ծանր վնասվածքներ չեն ստացել ու ինքնուրույն դուրս են եկել ինքնաթիռից։ Փոքր ինքնաթիռը զգալի վնասվել է․ դրա շարժիչն ու թևերից մեկը լրիվ շարքից դուրս են եկել, թեև իրանն ամբողջական է մնացել։
