Բանակից հետո երկրորդ տեղը, որ պետք է փող հատկացել՝ Սևանն է. Սանոսյան

Ցավոք սրտի, արդեն 3 տարի է՝ Սեւանի կանաչելու պրոցեսն ունենք: Այս մասին, այսօր՝ հուլիսի 24-ին, Շորժա համայնքում՝ Սեւանա լճի ափին տեղի ունեցած ասւոլիսի ժամանակ նշեց Գեղարքունիքի մարզպետ Գնել Սանոսյանը:

«Այս պրոցեսը միշտ եղել է, բայց մասշտաբներն այլ են եղել եւ սեզոնայնությունն է այլ եղել, հիմնականում եղել է սեպտեմբեր ամսին եւ շատ քիչ ծավալով»,- ասաց Սանոսյանը:

Մարզպետի խոսքով՝ լճի կանաչման դեմ աշխատանքներ տարվում են, բայց դրանք կարծես բավարար չեն. «Խոստովանում եմ, որ մեր աշխատանքները կարծես բավարար չեն, մաքրվող տարածքների հետ կապված, գետերի վրա մաքրման կայանների, ափերին գտնվող օբյեկտներում մաքրման կայանների տեղադրման առումով թեեւ որոշակի աշխատանք կա, բայց այդ աշխատանքները դանդաղ են ընթանում՝ տարբեր օբյեկտիվ եւ սուբյեկտիվ պատճառներից ելնելով, եւ մեկ անգամ ասել եմ, հիմա էլ  կասեմ՝ բանակից հետո երկրորդ տեղը, որ պետք է փող հատկացնել՝ Սեւանա լիճն է: Մեր կառավարությունը, մեր գործընկերները, կարծում եմ, սա շատ լավ գիտակցում են, բազմաթիվ անգամ ասել եմ, եւ այդ ուղղությամբ այս պահին լրջագույն աշխատանքներ են տարվում»: