Ռոբերտ Սուքիասյանի ` գործարար Խաչատուր Սուքիասյանի եղբոր,  մասնակցությամբ որևէ միջադեպ տեղի չի ունեցել: Այս մասին Auroranews-ի հետ զրույցում հայտնեց Խաչատուր Սուքիասյանի մամուլի խոսնակ Աննա Մկրտչյանը: 

«Ռոբերտ Սուքիասյանը երեկ` երեկոյան  չի գտնվել Երևանի Զավարյան փողոցում գտնվող գրասենյակում, նրա մասնակցությամբ որևէ միջադեպ տեղի չի ունեցել: Ոստիկանությունում նյութեր են նախապատրաստում, թող պարզվի,  թե ինչ է տեղի ունցել իրականում և ում մասնակցությամբ է վիճաբանություն տեղի ունեցել»,- մեզ հետ զրույցում ասաց Մկրտչյանը: 

Հիշեցնենք, որ News.am-ը քիչ առաջ տեղեկատվություն տարածեց այն մասին , որ երեկ երեկոյան միջադեպ է տեղի ունեցել «ՍԻԼ Կոնցեռն» ՍՊԸ-ի հիմնադիր, գործարար Խաչատուր Սուքիասյանին պատկանող գրասենյակներից մեկում: 

Ըստ լրատվամիջոցի` Խաչատուր Սուքիասյանի կրտսեր եղբայրը Երևանի Զավարյան փողոցում գտնվող գրասենյակում (Նախկին Սիլաչի հյուրանոցի հարևանությամբ)  թիկնապահի հետ ծեծի է ենթարկել  մոսկվայաբնակ գործարար Օնիկ Կարապետյանին ։

«Ինձ զանգահարեցին, ասացին, որ մորքուրիդ տղայի հետ կապված խոսակցություն կա, 2016թ. իրար հետ գործ եք արել, իրեն փող ես պարտք։ Ասացի՝ դուք դրա հետ ի՞նչ կապ ունենք, ասացին՝ արի, կխոսենք»,–ասել է Կարապետյանը լրատվամիջոցի հետ զրույցում։

Գործարարը լրատվամիջոցին հայնտնել է,  որ տարիներ առաջ Մոսկվայում մորաքրոջ որդու հետ շինարարության հետ կապված գործ են սկսել, սակայն չեն հաջողել և ֆինանսական վնասներ են կրել, այնուհետև մորաքրոջ որդին պահանջել է  վերադարձնել իր ներդրած գումարը, մինչդեռ Կարապետյանը պնդում է, որ ամեն ինչ օրինական է եղել, և ինքը որևէ մեկին գումար պարտք չէ։ 

«Գնացի Սիլաչիի կողմերը, իրենց տարածքն էր, Ռուբենն ու ախռանիկներն էին։ Ռուբենն ասաց՝ մեր փողն ա, մեզ պետք ա տաս էդ փողը, ասացի՝ ես ոչ մեկին փող պարտք չեմ։  Սկզբում ասացին, իբր 80. 000 ԱՄՆ դոլար եմ պարտք, հետո՝ 200.000 դոլար։ Ռուբենն ասաց՝ քեզ  երկու օր ժամանակ, եթե 200.000 դոլար չբերես, ուրեմն տունդ վարի կտանք, տանդ տեղն էլ գիտենք, քեզ էլ գիտենք։ Ես ասացի՝ ոչ մեկին էլ պարտք չեմ, ու էդ խոսքիս վրա Ռուբենն էր ու իր ախռանի պետ Արտաշը սկսեցին հարվածել ինձ, դեմքիս ու գլխիս էին խփում, քիթս ջարդել են։ Ինձ ասացին՝ աջ ու ձախ չանես, ոչ մի տեղ չգնաս, չբողոքես, մեկ ա՝  վարչապետն էլ ա մեր յանից, ոստիկանությունն էլ»,–ասել է Կարապետյանը՝ հավելելով, որ ամբողջ գիշեր անցկացրել է հիվանդանոցում, որտեղ քթի վիրահատության է ենթարկվել, սակայն, հաշվի առնելով որ կորոնավիրուսով պայմանավորված  հիվանդանոցում տեղ չի եղել մնալու, գնացել է տուն։

Ոստիկանությունից Auroranews-ին հայտնեցին, որ այսօր՝ հուլիսի 22-ին ժամը 4-ին, ոստիկանության Էրեբունի բաժնում քաղաքացին հաղորդում է ներկայացրել և հայտնել, որ նախորդ օրը ժամը 23-ին Զավարյան փողոցում վիճաբանության ժամանակ իրեն ծեծի են ենթարկել։ Դեպքի կապակցությամբ ոստիկանությունում նյութեր են նախապատրաստվում, նշանակվել է դատաբժշկական փորձաքննություն։