Հակառակորդը ծուղակի մեջ է հայտնվել, բայց այդ ծուղակը չի նշանակում, որ վերջնական գերության վիճակում են եղել. Ա. Հովհաննիսյան. ՀԺ

Տեղանքի մարտական իրավիճակից ելնելով՝ հակառակորդը ծուղակի մեջ է հայտնվել, բայց այդ ծուղակը չի նշանակում, որ վերջնական գերության վիճակում են եղել։ Այս մասին «Հայկական ժամանակ»-ի հետ զրույցում ասաց ՀՀ պաշտպանության նախարարության ներկայացուցիչ, ռազմական փորձագետ Արծրուն Հովհաննիսյանը՝ անդրադառնալով երեկ Տավուշի հայկական «Անվախ» դիրքի ուղղությամբ հակառակորդի հարձակման հերթական փորձին։

Նշենք, որ երեկ ուշ երեկոյան ՀՀ ՊՆ-ն հայտնեց, որ ադրբեջանական հատուկ ջոկատայինները Տավուշում հայկական «Անվախ» դիրքի ուղղությամբ հերթական հարձակումն են ձեռնարկել։ ՀՀ զինված ուժերին հաջողվել է գրոհը հետ մղել՝ պատճառելով կորուստներ։ Ըստ նախնական տվյալների՝ հակառակորդի հատուկ նշանակայինները բացի կորուստներից, ունեցել են նաև ծուղակում մնացած զինծառայողներ, որոնք չեն կարողացել կատարել իրենց խնդիրը: Ադրբեջանական զինված ուժերի հատուկ նշանակության ստորաբաժանման ձեռնարկած անհաջող հարձակումից հետո այժմ կատարվում է լրահետախուզում՝ ավելի մանրամասն իրավիճակը հասկանալու համար։

Արծրուն Հովհաննիսյանը նշեց, որ հակառակորդը զոհեր ունի, սակայն թե քանիսն են, չի կարող ասել։