Հակառակորդի «ORBITER-3»-ը խոցվել է «Оса-АКМ» զենիթահրթիռային համակարգով. Արծրուն Հովհաննիսյան
Ճգնաժամային տեղեկատվական կենտրոնում այսօր ևս ներկայացվել է սահմանային իրավիճակի ամփոփում: Կենտրոնի պատասխանատու Արծրուն Հովհաննիսյանը հայտարարել է, որ սահմանագոտու ողջ երկայնքով հիմնականում եղել է հանգիստ, թեթևակի կրակոցներ հնչել են հրաձգային զենքերից ոչ կանոնավոր, ոչ մեծ քանակի:
Նա նշել է, որ մեր պաշտպանության բանակի ՀՕՊ ստորաբաժանումները խոցել են ադրբեջանական հերթական անօդաչու սարքը, այս անգամ ևս Օրբիտեր 3 տեսակի: Մասնավորապես, հակառակորդի «ORBITER-3»-ը խոցվել է «Оса-АКМ» զենիթահրթիռային համակարգով, որը մոդերնիզացրել են հայկական ռազմարդյունաբերական ընկերությունները:
Ինչ վերաբերում է սահմանային լարվածության հետևանքով օրեր առաջ վիրավորված հայ զինծառայողների առողջական վիճակին, Հովհաննիսյանը նկատել է, որ հիմնականում բոլորի առողջական վիճակում կա դրական դինամիկա, բացի մեկից, ում վիճակը ծայրահեղ ծանր է:
Հովհաննիսյանը նաև նշել է.
«Ճիշտ է, հրետակոծությունները կարծես թե տևական ժամանակ դադարել են, բայց տեղեկատվական տիրույթում շարունակվում են ապատեղեկատվությունները՝ ամենատարբեր կեղծ օգտատետերից խուճապի տարածում, գնահատականներ և այլն: Ես հորդորում եմ խուսափել գնահատականներ տալուց, ընդհանրացված գնահատականներ են տալիս։ Հատկապես միտում եմ նկատում, որ ընդհանրացնող եզրակացություններ են անում՝ ինչ տեղի ունեցավ, ինչպես տեղի ունեցավ, ինչ վերցրինք, ինչ կորցրինք, ով հաղթեց, ով պարտվեց։ Հարգելինե՛րս, վաղ է այդ մասին խոսել, և չտանք այսպիսի ծավալուն քոմենթներ»,-ասել է նա:
