«Ռոսգոստրախ»-ի նախկին համասեփականատեր Սերգեյ Խաչատուրովը դատապարտվել է ազատազրկման

Մոսկվայի Դորոգոմիլովսկի դատարանը 8 տարվա ազատազրկման է դատապարտել «Ռոսգոսստրախ» ՀԲԸ-ի նախկին փոխնախագահ Սերգեյ Խաչատուրովին՝ բազմամիլիոնանոց հափշտակումների եւ հանցավոր եկամուտների օրինականացման համար, հայտնում է «Ինտերֆաքս»-ը:

«Խաչատուրովին նշանակել 8 տարվա ազատազրկում՝ ընդհանուր ռեժիմի ուղղիչ գաղութում», - ասվում է դատավոր Օլգա Բիկովսկայայի վճռում:

Գործով ներգրավված մեկ այլ անձի՝ Նադեժդա Կլեպալսկայային, ով «ՌոսգոսստրախԲանկ» ՀԲԸ-ի տնօրենների խորհրդի ղեկավար Սվետլանա Կլեպալսկայայի քույրն , եւ «Տեխնիկա ու ավտոմատիկա» ԲԲԸ-ի գլխավոր տնօրենը, դատարանը դատապարտել է 6 տարվա ազատազրկման: Դատարանը ամբաստանյալների համար լրացուցիչ տույժեր՝ տուգանք կամ որոշակի գործունեության արգելք, չի նշանակել:

Բացի այդ, դատարանը դատապարտյալներից բռնագրավել է ավելի քան 8 միլիարդ ռուբլի՝ տուժածներին պատճառած վնասներիի («Բանկ ՖԿ Օկրիտիե» ՀԲԸ-ին՝ մոտ 5,8 մլրդ եւ «ՌԳՍ Ակտիվներ» ԲԲԸ-ն՝ մոտ 2,3 մլրդ) հատուցման համար։

Ըստ դատավճռի, Խաչատուրովը մեղավոր է ճանաչվել առանձնապես խոշոր չափի վատնումների (ՌԴ ՔՕ 160-րդ հոդվածի 4-րդ մաս), հատկապես խոշոր խարդախության (ՌԴ ՔՕ 159-րդ հոդվածի 4-րդ մաս) եւ հանցավոր եկամուտների օրինականացման (ՌԴ ՔՕ 174.1-րդ հոդվածի 4-րդ մասի «բ» կետ) մեջ, Կլեպալսկայան՝ վատնումներին օժանդակելու (ՌԴ ՔՕ 160 հոդվածի 4-րդ մաս, 33-րդ հոդվածի 5-րդ մաս), խարդախության եւ օրինականացման մեջ:

Դատարանը պարզել է, որ 2017թ․ հունվարից մինչեւ 2018թ․ ապրիլն ընկած ժամանակահատվածում Խաչատուրովը, լինելով «ՌԳՍ Ակտիվներ»-ի գլխավոր տնօրեն եւ «Ռոսգոսստրախ»-ի փոխնախագահ, Կլեպալսկայայի եւ այլ հանցակիցների հետ միասին, յուրացրել են «Նեւսկի» անշարժ գույքի փակ ներդրումային հիմնադրամի ավելի քան 18 000 ներդրումային բաժնետոմսեր։ Դրանց փաստացի արժեքը կազմել է ավելի քան 2 միլիարդ 290,7 միլիոն ռուբլի: Բացի այդ, խարդախ ճանապարհով առեւանգվել է «Ռոսգոսստրախ»-ի ավելի քան 15 միլիոն բաժնետոմս, որոնց արժեքը գերազանցել է 5 միլիարդ 779 միլիոն ռուբլին: Դրանից հետո դատապարտյալները օրինականացրել են ստացած գումարը:

2018-ի գարնանը կալանավորված Խաչատուրովն ու Կլեպալսկայան իրենց մեղքը չեն ընդունել:

Խաչատուրովի դեմ դատավճիռը կբողոքարկվի, «Ինտերֆաքս»-ին հայտարարել է նրա փաստաբան Ալեքսանդր Գոֆշտեյնը:

«Մենք, իհարկե, բողոքարկելու ենք դատավճիռը: Այս փաստաթուղթը, բացի ափսոսանքի եւ դառնության զգացողությունից, ոչինչ չի առաջացնում»,- ասել է Գոֆշտեյնը:

Գոֆշթեյնի կարծիքով՝ «նման դատավճիռները թունավորում են Ռուսաստանի, որպես պետության, գործարար միջավայրը եւ ներդրումային գրավչությունը»: «Ցավալի է, որ դատավճիռը կայացնելիս, ի հեճուկս օրենքի եւ առկա ապացույցների, դատարանը այդքան դաժան վերաբերվեց երկու անմեղ մարդկանց ճակատագրին»,- նշել է փաստաբանը:

Քաղաքականություն

Պատահարներ