Լոռու մարզում ներկա պահին բուժման մեջ է գտնվում 261 քաղաքացի, որոնցից 56-ը հոսպիտալացված են

Լոռու մարզպետ Անդրեյ Ղուկասյանը հունիսի 29-ին անցկացրել է հերթական աշխատանքային խորհրդակցությունը: Ի թիվս այլ հարցերի, մարզի ղեկավարին ներկայացվել են համավարակով պայմանավորված ստեղծված իրավիճակում իրականացվող աշխատանքները: Մասնավորապես տեղեկացվել է, որ պատշաճ վերահսկողություն է իրականացվում Պարետի ցուցումների կատարման ուղղությամբ:

Լոռու մարզպետարանի լրատվական ծառայության փոխանցմամբ, նշվել է, որ Լոռու մարզում այսօրվա դրությամբ կորոնավիրուսով վարակվածության ընդհանուր դեպքերի թիվը 616 է, որոնցից առողջացել են 348-ը: Արձանագրված մահվան դեպքերի ընդհանուր թիվը՝ 7:

Ներկա պահին բուժման մեջ է գտնվում 261 քաղաքացի, որոնցից 56-ը հոսպիտալացված են, իսկ 205-ը գտնվում են տանը՝ թաղամասային բժիշկների հսկողության տակ:

Ինքնամեկուսացման մեջ է գտնվում 674 քաղաքացի:

Նախորդ շաբաթ մարզի ղեկավարի կողմից տրված հանձնարարականի հետ կապված տեղեկացվեց նաև, որ Վանաձորի Ուկրշին տնակային ավանում՝ ուժեղ անձրևի հետևանքով սելավաջրերի հոսքից առավել տուժած 3 ընտանիքի ֆինանսական աջակցության տրամադրումը ընթացքի մեջ է:

Խորհրդակցության ընթացքում անդրադարձ է կատարվել մարզի համար օրախնդիր ոլորտային մի շարք այլ հարցերի ևս: Տրվել են հանձնարարականներ: