ՏԵՍԱՆՅՈՒԹ․ 6-ամյա Անաստասիան խնամում է կենդանիներին և խնդրում ՝ չնեղացնել նրանց

Երեկ «Դինգո Թիմ» հասարակական կազմակերպությունը ֆեյսբուքյան իր էջում հրապարակեց մի լուսանկար, որում երևում էր, որ 6-ամյա աղջնակը մշտապես խնամում և հոգ է տանում կենդանիներին։ 

Կազմակերպությունը լուսանկարին կից հրապարակեց աղջկա պատմությունը, որը ներկայացնում ենք ստորև․ 

«6 տարեկան փոքրիկ Անաստասիան ուզում է դառնալ կենդանաբույժ և բակում կռիվ է անում բոլորի հետ, ովքեր համարձակվում են նեղացնել կենդանիներին: Նա ամեն օր կերակրում է բակի կենդանիներին, ավելին` օրեր առաջ բակի փիսիկի ոտքը վնասվել էր, նա իր սեփական նախաձեռնությամբ Բետադին էր քսել վերքին և բինտով վիրակապել: Վստահ կարող ենք ասել, Անաստասիան հիանալի մարդ է մեծանում: Շնորհակալություն նրա ծնողներին»,-գրել է թիմը։ 

Մեր թղթակիցը ծանոթացել է փոքրիկ Անաստասիայի հետ, որը իր ծնողների աջակցությամբ կարողանում է հոգ տանել և խնամել կենդանիներին, որոնք ունեն նրա աջակցության կարիքը։ Ներկայացված տեսանյութում երևում է, թե ինչպես է 6-ամյա Անաստասիան բուժում կատվի վնասված ձեռքը։ 

Այս հարցում աղջնակին օգնում են նրա ընտանիքի անդամները տատիկը՝ տիկին Կարինեն, մայրիկը՝ Քրիստինեն և քույրիկը՝ Արինան։ 

Ի դեպ, փոքրիկ Անաստասիան այս տարի առաջին անգամ դպրոց է գնալու  և ունի երազանք ՝ որն է մշտապես օգնել կենդանիներին և թույլ չտալ նեղացնել նրանց։