Ինձ համար զարմանալի էր, որ Միքայել Մինասյանը ԲՀԿ-ին որպես ընդդիմություն էր դիտում. Ալեն Սիմոնյան

Պետք է պարոն Մարուքյանն արձագանքի Միքայել Մինասյանի հայտարարություններին, ոչ թե ես. ես միտք չունեմ խառնվել այդ երկու անձանց փակ կամ բաց նամակագրությանը: Այս մասին, այսօր՝ հունիսի 25-ին, ԱԺ-ում լրագրողների հետ զրույցում նշեց ԱԺ փոխխոսնակ Ալեն Սիմոնյանը՝ անդրադառնալով նրան, որ Վատիկանում ՀՀ նախկին դեսպան Միքայել Մինասյանը «Լուսավոր Հայաստանի» ղեկավար Էդմոն Մարուքյանին հրապարակավ ասել էր, որ ի տարբերություն նրա, Հրայր Թովմասյանը եւ ՍԴ մյուս անդամները չտրվեցին շանտաժին, չվախեցան խելագարից: 

«Թող իրենք իրար մեջ պարզեն, թե ով ում պրոյեկտն է եղել, եղել է, թե չի եղել: Ես կարդացի, որ ինքը պատրաստակամություն էր հայտնել լինել Էդմոն Մարուքյանի պրոյեկտը: Ինձ համար նաեւ զարմանալի էր, որ Միքայել Մինասյանը ԲՀԿ-ին որպես ընդդիմություն էր դիտում: Ես համարում եմ, որ դա զավեշտ է»,-ասաց նա: 

Դիտարկմանը, որ Միքայել Մինասյանը նշել է, որ միակ ընդդիմությունը ԱԺ-ում ԲՀԿ-ն է, Ալեն Սիմոնյանը խորհուրդ տվեց Միքայել Մինասյանին հաջորդ ընտրություններին  մասնակցել ԲՀԿ-ի ցուցակով: