Գյումրի. առցանց եղանակով առաջին դասարան կընդունվի 1822 աշակերտ

Հանրապետության բոլոր  դպրոցներում նոր ուսումնական տարվա առաջին դասարանցիների ընդունելությունը բացառապես էլեկտրոնային գրանցման եղանակով է: Անցած տարի ընդունելության առցանց համակարգը փորձարկվեց միայն մայրաքաղաքի դպրոցներում։ Օնլայն եղանակով ընդունելությամբ փորձ է արվում դպրոցների միջև մրցակցային հավասար պայմանների հարթակ ստեղծել: 
Նախկին թղթատարության ու ծնողների դպրոց գնալու պարտադրանքի փոխարեն տնից ընդամենը մի քանի րոպեում առցանց գրանցումով գործն ավարտվում է: 

Հունիսի 1-10-ը եղել է գրանցումների առաջին փուլը, որը համարվել է բաց, բայց ոչ բոլորի համար: Այսինքն՝ առաջին փուլով գրանցվել են ՝ դպրոցի մանկավարժների կամ դպրոցում սովորող նույն ընտանիքի երեխաները: Այժմ արդեն առցանց հարթակը հասանելի է առաջին դասարանում բոլոր հայտագրվողների համար: 

[c1c907940d216caea88af49d7d78deb2.png]

[93dc0bc418c9c05c6e8f2e2653a9c654.png]

Գործում են սահմանափակումներ, որոնք միջնակարգ և  հիմնական դպրոցների համար ըստ լիցենզավորման կարգի են՝ հաշվի առնելով շենքային պայմաններն ու դասվարական կազմը, և ըստ այդմ՝ առաջին դասարանցիների  ընդունելության թիվ է սահմանվել: 
Գյումրու հիմնական և միջնակարգ 27 դպրոցներում առցանց համակարգով ընդունելության սահմանային չափը 1822 է: Ամենաշատ առաջին դասարանցիներ՝ 155 երեխայի ընդունելու թույլտվություն ունի մեկ դպրոց, որը նորակառույց Մուշ 2/2  թաղամասում է, ևս մեկ դպրոց էլ նվազագույնը՝  ընդամենը  3 առաջին դասարանցի է  ընդունելու, խոսքը Շերամ թաղամասի մասին է։ Առցանց համակարգով առաջին դասարանցիների  ընդունելությունը կշարունակվի մինչև օգոստոսի սկիզբը: