Վեդիի դատարանը փակ է. կորոնավիրուսով վարակման դեպքեր են գրանցվել նաև Վճռաբեկում և ԲԴԽ-ում

Դատական համակարգում կորոնավիրուսի բազմաթիվ դեպքեր են արձանագրվել։ Ինչպես հայտնում է ArmDaily.am-ը, վարակվածների մեջ դատավորներ չկան, սակայն կան բազմաթիվ մեկուսացված դատավորներ, ովքեր շփվել են վարակակիրների հետ, ուստի՝ չի բացառվում, որ առաջիկա օրերին նրանց մոտ եւս հաստատվի վիրուսը։ Դատական համակարգում կորոնավիրուսով վարակվածների գերակշիռ մասը օգնականներ, նիստերի քարտուղարներ են, ովքեր սերտ շփումներ են ունեցել դատավորների հետ։

Լրատվականի տեղեկություններով՝ Վեդիի դատարանը այս պահին փակ է, երեք օգնականի մոտ կորոնավիրուս է հայտնաբերվել, դատավորները մեկուսացվել են։ Վարչական եւ Վճռաբեկ դատարաններում եւս կորոնավիրուսի հաստատված դեպքեր կան, վարակակիրները դատավորների օգնականներ են։ ԲԴԽ-ում եւս կորոնավիրուսի դեպքեր են արձանագրվել, հավաքարարներից երկուսի մոտ վարակը հաստատվել է։ Դատարաններից մեկում էլ կորոնավիրուսի 6 դեպք է հաստատվել։ Սա ամբողջական ցանկը չէ դատական համակարգում արձանագրված դեպքերի, վիճակագրությունը փոխվում, իսկ թվերը աճում են։