Նորքի տուն-ինտերնատի տարեցներից 3-ի վիճակը ծանր է. Аrmtimes.com

Հայաստանում COVID-19-ի նոր՝ վտանգավոր օջախներից մեկում՝ Երեւանի «Նորքի տուն֊ինտերնատ»֊ում վարակվածների թվում են թե այնտեղ բնակվող տարեցները եւ թե հաստատության աշխատակիցները: Թեստավորվել է 70 քաղաքացի։  Այս պահի դրությամբ հաստատվել է կորոնավիրուսի 45 դեպք։ Նրանցից 28֊ն աշխատակիցներ են, որոնք մեկուսացվել են հյուրանոցներում, քանի որ չունեն սիմպտոմներ։ Վարակվածներից 17-ը տարեցներ են, որոնցից 3֊ն այժմ մեկուսացված են ինտերնատի տարածքում։ Մնացած 14֊ը հոսպիտալացվել են տարբեր բժշկական հաստատություններում։ Այս պահի դրությամբ՝ 14-ից 3-ի վիճակը ծայրահեղ ծանր է:

Ինչպես Armtimes.com-ին տեղեկացրել է ՀՀ աշխատանքի և սոցիալական հարցերի նախարարության հասարակայնության հետ կապերի բաժնի պետ Սոնա Մարտիրոսյանը, ցուցակներով հերթով կատարվում է վարակվածների տեղափոխումը բժշկական հաստատություններ։ 5 քաղաքացի այժմ գտնվում է «Սուրբ Գրիգոր Լուսավորիչ» ԲԿ-ում։ Այլ քաղաքացիներ, որոնց առողջական վիճակը լավ է, մեկուսացված են ինտերնատի տարածքում։ Վարակվածների մեջ կան քաղաքացիներ, որոնք ինտերնատում անկողնային բաժնում են գտնվում, այսինքն՝ հիմնականում պառկած են լինում, և նրանց առողջական վիճակը, անկախ վիրուսի առկայությունից, ծանր է։

Ե՞րբ եւ ինչպե՞ս է հաստատություն ներթափանցել վարակը, ըստ Սոնա Մարտիրոսյանի, հանելուկ է։ Փետրվարի 27-ից այն փակ է եղել, ելք ու մուտք չի եղել, նույնիսկ տնօրինությունն ու աշխատակիցները գիշերել են այնտեղ։

Հաշվի առնելով՝ այն հանգամանքը, որ տուն-ինտերնատը COVID-19-ի դեմ պայքարի առաջնագծից՝ «Նորք»֊ի ինֆեկցիոն հիվանդանոցից 20 մետր հեռավորության վրա է գտնվում, հատկապես ուշադիր են եղել, անգամ դարպասներից դուրս չեն եկել։

Սոնա Մարտիրոսյանի խոսքով՝ ընթացքում կառույցից դուրս գալու ընդամենը մեկ բացառություն է եղել։ Անկողնային բաժնում գտնվող մի տատիկի տեղափոխել են «Էրեբունի» ԲԿ, քանի որ առողջական վիճակը վատացել է։ Դուրս գրելուց անմիջապես հետո՝ թեստավորել են, պատասխանը բացասական է եղել։

Այժմ կասկածում են՝ հնարավոր է վիրուսը գաղտնի եղել է օրգանիզմում։

Արդյո՞ք հաստատությունը մի որոշ ժամանակով կփակվի եւ այնտեղ ախտահանիչ միջոցառումներ կիրականցվեն, այս պահին չեն կարող ասել։

Մանրամասները՝ սկզբնաղբյուրում։