Երբ Երեւանի ավագանու ընտրությունների ժամանակ շատ համակարգված ձեւով ինձ սարքեցին թիրախ, իմ երեխային, իմ ընտանիքը, իմ մահացած հոր գերեզմանը դարձրին թիրախ, պետությունը որեւէ բան չարեց: Այս մասին այսօր՝ մայիսի 11-ին, ԱԺ-ում հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը: 

«Երբ ես ասում էի, որ մենք կանգնած ենք կարեւոր ջրբաժանի առջեւ, որ ատելությունը կազմաքանդում է հասարակությունը, ինձ հակադարձում էին, թե գուցե ձեզ չեն սիրում, դրա համար ատելության խոսք է հնչում ձեր նկատմամբ: Այո, չի կարելի կանանց սորտավորել, չի լինում ընդդիմադիր կին, իշխանական կին, կինը կին է: Ինձ 17 անգամ այրելու կոչ են արել, 7 անգամ գլխատելու, 4 անգամ քառատելու եւ 6 անգամ կախելու: Ես չեմ խոսում ֆեյք ինդուստրիայի մասին, որոնք թաքնվում են տարբեր անունների տակ: Ես խոսում եմ իրական օգտատերերի մասին, եւ պետությունը ոչինչ չարեց ինձ պաշտպանելու: Ես չեմ կոտրվում, ինձ կոտրել հնարավոր չէ, ես ներում եմ բոլոր այդ մարդկանց, բայց երբեք չեմ մոռանալու այդ անունները»,- հայտարարեց Զոհրաբյանը: