Ղազախստանի նախագահի դուստրն ազատվել է պաշտոնից
Ղազախստանի նախագահ Կասիմ Ժոմարտ Տոկաևը դադարեցրել է խորհրդարանի Սենատի խոսնակ Դարիգա Նազարբաևայի լիազորությունները։ Ինչպես հաղորդում է «Արմենպրես»-ը, այս մասին հայտնել են Ղազախստանի նախագահի մամուլի ծառայությունից։
Որոշման պատճառը դեռևս չի նշվում։ Միևնույն ժամանակ, երկրի ղեկավարը շնորհակալություն է հայտնել Նազարբաևային արդյունավետ աշխատանքի համար։ «Շնորհակալությունն եմ հայտնում Դ․ Ն․ Նազարբաևային՝ Ղազախստանի Հանրապետության խորհրդարանի Սենատի նախագահի պաշտոնում ակտիվ և արդյունավետ աշխատանքի համար»,- գրել է Տոկաևը «Թվիթեր»-ի իր միկրոբլոգում։
Ղազախստանի Սահմանադրության համաձայն՝ Սենատի նախագահի պաշտոնը երկրորդն է նախագահի պաշտոնից հետո։
Դարիգա Նազարբաևան Ղազախստանի առաջին նախագահ Նուրսուլթան Նազարբաևի ավագ դուստրն է։ Նազարբաևը երկրի ղեկավարի իր լիազորությունները թողել է 2019 թվականի մարտին։ Դարիգա Նազարբաևան 2016-ին եղել է խորհրդարանի Սենատի պատգամավոր, պալատի խոսնակ է ընտրվել 2019 թվականի մարտին։
