Փաշինյանը իրավապահներից պահանջել է իմ նկատմամբ քրգործ հարուցեն. Վանեցյան
«Ես վարչապետի սիրած բառերով կասեմ։ Օդում կախված լուրերի համաձայն, Նիկոլ Փաշինյանը երեկ շատ վատ հանդիպում է ունեցել իրաապահ համակարգի ներկայացուցիչների հետ, որի ժամանակ պահանջել է՝ ցանկացած մի պատրվակով իմ նկատմամբ քրեական գործ հարուցեն և ինձ ենթարկեն քրեական պատասխանատվության»,- այս մասին «Արմնյուզ»-ին տված հարցազրույցում հայտարարել է ԱԱԾ նախկին տնօրեն Արթուր Վանեցյանը։
Ըստ Վանեցյանի հենց դրանով է բացատրվում այն հանգամանքը, որ վարչապետի մամուլի խոսնակը կեսգիշերին մոտ հայտարարություն է արել, որտեղ նաև իր անունն էր հիշատակել։
«Իրավապահ համակարգի ներկայացուցիչները հրաժարվել են ոչ թե իմ նկատմամբ կատարել այս կամ այն գործողությունները, այլ ասել են, որ կատարված օպերատիվ-հետախուզական գործողությունների արդյունքում որևէ հակաօրինական արարք Արթուր Վանեցյանի գործունեության մեջ չի հայտնաբերվել»,- նշել է Արթուր Վանեցյանը և հավելել․
«Արդյունքում վարչապետը պատասխանել է, որ եթե դուք չեք կարողանում այդ հարցը լուծել, կլուծեմ ես։ Եվ գիշերը՝ ժամը 12-ին դուրս է գալիս մամուլի խոսնակի հայտարարությունը, որտեղ վերջին նախադասությամբ շատ հստակ ու ուղիղ հանձնարարական է տրվում իրավապահ մարմիններին ձեռնարկել միջոցառումներ այդ հանցագործությունները բացահայտելու ուղղությամբ»,- մանրամասնեց նա։
Ըստ ԱԱԾ նախկին տնօրենի այս ամենի նպատակն է շեղել հասարակության ուշադրությունը շատ կարևոր հարցերից։
