Այլ տեղերից սպիրտ է ներկրվել, և դա ներկայացվել է որպես տեղական սպիրտ. Փաշինյան
Կոնյակ արտադրողների համար պետտուրքի չափը 10 մլն դրամից 50 հզր դրամ իջեցնելու վերաբերյալ այսօրվա կառավարության քննարկման ժամանակ վարչապետ Նիկոլ Փաշինյանն անդրադարձել է հետևյալ խնդրին:
«Կարծում եմ, որ կոնյակի որակի առումով ավելի կարևոր է խաղողի հետագծելիության հստակ մեխանիզմ ունենալը: Ինչի մեջ է պրոբլեմը. էն, որ այլ տեղերից սպիրտ է ներկրվել, և դա ներկայացվել է որպես տեղական սպիրտ: Ստեղ պրոբլեմը մենակ կոնյակագործությանը չէ, այլև գյուղատնտեսությանը, էն, որ խաղողի այգիները կտրվել են ու տեղը ցորեն է ցանվել, նաև սրա հետևանքն է: Հետևաբար ինչն է պատճառը, որ հիմա չենք գնում այդ մեխանիզմով, որ մարդն ասում է` էսքան խաղող եմ մթերել, պետք է ապացույց ունենա, որ աշխարհում մեխանիզմները կան, որ խաղողի հումքը հաշվառվում է, և տեսնում ենք` խաղող մարդը մթերել է, թե ոչ: Մենք որոշել էինք, որ պետք է գնայինք այդ ճանապարհով»,- ասել է նա:
Տիգրան Խաչատրյանը պարզաբանել է, որ կարգավորման ճանապարհով են գնում:
Փաշինյանը խոսել է նաև հարկային եկամուտների մասին` ասելով, որ եթե դրանք չեն ձևավորվում, պետք է քաղաքականությունը փոխել:
Նշենք, որ ՊԵԿ նախագահը նախագիծը որակել է՝ հարկային արտոնություն տալ կոնյակ արտադրողներին, ինչի հետ Տիգրան Խաչատրյանը չի համաձայնել:
