ՀՀ վարչապետ Նիկոլ Փաշինյանը Երեւան է վերադարձել: Կառավարության շենքում ընթանում է քննարկում՝ որոշելու համար, թե արդյոք կա կարիք երկրում կամ ՀՀ առանձին շրջաններում արտակարգ դրություն մտցնել:

Վարչապետը նշեց, որ այդ դեպքում առանձնապես չի փոխվելու քաղաքացիների կյանքը, այլ պարզապես որոշ հատվածներում կխստացվի հսկողությունն այնպես, ինչպես Էջիածնում երեկ գիշերվանից:

Նիկոլ Փաշինյանը հիշեցրեց, որ Էջմիածնի 27 ելքերից այսօրվանից փակ է լինելու 24-ը: Հնարավոր է դուրս գալ Վաղարշապատ-Երեւան, Վաղարշապատ-Աշտարակ եւ Վաղարշապատ-Մասիս ճանապարհներով, որտեղ տեղում բժիշկներ են աշխատելու, ոստիկանական հսկողություն է սահմանվել:

Վարչապետը հավելեց, որ գիշերվանից դեռ նոր դեպքերի մասին տվյալներ չկան, սակայն նորություն է այն, որ երեկվա հայտարարված 28 անձանցից 1-ը Երեւանի արտադրական ձեռնարկություններից մեկի աշխատակից է: Նրա աշխատանքային գործընկերներն ու ձեռնարկության աշխատակիցները մեկուսացվում են:Նիկոլ Փաշինյանը հորդորեց չափազանցված գնումներ չկատարել. մեծ քանակությամբ սնունդ կուտակելու կարիք չկա: «Սա ճգնաժամ է, որից մենք դուրս կգանք շատ ավելի ուժեղացած: Այս ամենի մեջ պետք է գտնենք հնարավորություններ, այդ թվում՝ տնտեսական, որովհետեւ համաշխարհային շուկայում  են առկա խնդիրներ»,- ասաց վարչապետը: