ՈՒՂԻՂ․ Քայլերթ՝ ընդդեմ կանանց դեմ բռնության
Երեւանում, ապա նաեւ Գյումրիում այսօր՝ մարտի 9-ին քայլերթ է ընդդեմ կանանց նկատմամբ բռնության: Միջոցառման կազմակերպիչը «Ընդդեմ կանանց նկատմամբ բռնության» կոալիցիայի անդամներն են ու մի խումբ ֆեմինիստ-ակտիվիստներ. գրում է NEWS.am-ը:
«Օրեր առաջ հենց Գյումրիում՝ զուգընկերոջ դաժան ծեծի արդյունքում սպանվեց 43-ամյա Մարինեն։ Կնոջ կյանքը կարելի էր փրկել, եթե չլինեինք անտարբեր բռնության նկատմամբ, նկատեինք նրա դեմքի կապտուկները, ահազանգեինք, երբ 8 ժամ շարունակ նա ծանր վնասվածքներով պառկած էր տանն ու սպասում էր»,- ասում են քայլերթի մասնակիցները;
Քայլերթի մասնակիցների ձեռքին կան պաստառներ՝ «Կանայք սպանվում են ձեր լռության պատճառով», «Կանայք սպանվում են ընտանիքներում», «Ոչ բռնությանը», «Հերիք է՝ սպանեք մեզ», «Ոչ բռնությանը» գրություններով։
Հիշեցնենք՝ մարտի 5-ին Գյումրու Պռոշյան փողոցի տներից մեկում հայտնաբերվել էր 43-ամյա կնոջ դիակը՝ բռնության հետքերով: Նույն տնից «տրավմային շոկ, գանգուղեղային փակ վնասվածքով» վնասվածքներով հիվանդանոց էր տեղափոխվել 13-ամյա մի աղջիկ: Վերջինիս վիճակը շարունակում է մնալ ծայրահեղ ծանր:
