Ես այդ՝ կասկածյալի մեղադրանքը չեմ ընդունում․ Սեյրան Օհանյան
«Ես այդ՝ կասկածյալի մեղադրանքը չեմ ընդունում, ինձ հետ կապ չունի, կառավարությունն է որոշումը կայացրել»։ Այս մասին այսօր լրագրողների հետ զրույցում ասաց Պաշտպանության նախկին նախարար Սեյրան Օհանյանը՝ անդրադառնալով նախօրեին ՀՔԾ-ի տարածած հայտարարությունը, որի համաձայն՝ Ս. Օհանյանը որպես կասկածյալ է ներգրավվել ՀՀ քրեական օրենսգրքի 179-րդ հոդվածի 3-րդ մասի 1-ին կետով նախատեսված հանցավոր արարք` առանձնապես խոշոր չափերի` 1,046,400,000 ՀՀ դրամ արժողությամբ գույքի վատնում կատարելու կասկածանքով:
Օհանյանը նշեց, որ ընկերությունը 2002թ. փոխանցվել է ՊՆ-ին, 2010-ին օտարվել է:
«Ես և ՊՆ-ն որևէ շահագրգռվածություն չէինք կարող ունենալ: Կառավարության որոշմամբ փոխանցվել է, կառավարության որոշմամբ օտարվել է։ Ես կարող եմ ասել, որ այն ժամանակվա օտարման գինը եղել է 10 մլն դոլար, այսօրվա կուրսով` շուրջ 9.5 մլն, այսինքն՝ ՊՆ-ն շահագրգռվածություն չուներ: Ես այդ կասկածանքը չեմ ընդունում, որովհետև ինձ հետ որևէ կապ չունի, քանի որ ՊՆ-ն է կառավարության որոշումը ներկայացրել, ավելին, իրենք ասում են, որ խափանման միջոց է ընտրվել ստորագրությունը չհեռանալու մասին, ես ցուցմունք չեմ տվել, ստորագրություն չեմ տվել, որովհետև քանի՞ անգամ կարող եմ ստորագրություն տալ, Մարտի 1-ի գործով էլ ունեմ ստորագրություն»,- ասաց նա:
Հիշեցնենք, ըստ ՀՔԾ-ի՝ քրեական գործով ձեռք բերված փաստական տվյալների համաձայն` 2010թ. ընթացքում ՀՀ պաշտպանության նախարարության կողմից մշակված ՀՀ կառավարության գաղտնի որոշման նախագծով, առանց օրենքի մի շարք պահանջների պահպանման, մասնավորապես` առանց գույքի պարտադիր գնահատման, առաջարկվել է թույլատրել ՀՀ ՊՆ-ին՝ որպես «Ձորա ՀԷԿ» ՓԲԸ պետական սեփականություն հանդիսացող բաժնետոմսերի փաթեթի կառավարման լիազորություններն իրականացնող մարմնի, հավանություն տալ 3,600,000,000 ՀՀ դրամ գումարով ընկերության գույքի օտարմանը «Ձորագետ Հիդրո» ՍՊ ընկերությանը:
