«Մարտի 1-ին, ժամը 18.00-ին, Ազատության հրապարակից շարժվում ենք երթով»,-իր ֆեյսբուքյան էջում գրել է ՀՀ վարչապետ Նիկոլ Փաշինյանը՝ ներկայացնելով տեսանյութ հուշարձանի մասին, որը կտեղադրվի՝ ի հիշատակ 2008 թվականի մարտի 1-ի զոհերի։ 

Վարչապետը մեկ այլ գրառման մեջ նշել է. «Այս բուկլետը նաեւ լավ հուշանվեր է: Սիրով կնվիրեմ բոլորիդ»: 

Եվս մեկ գրառման մեջ էլ լուսանկար է տեղադրել ու հարցրել քաղաքացիներին. «Իսկ հետաքրքիր է՝ երեք տարբերակներից ո՞րն եք ավելի շատ հավանում»։
 

Եվ այս վերջին գրառումն էլ դարձել է քննարկման թեմա: armdaily.am-ը գրում է. «ՀՀ վարչապետ Նիկոլ Փաշինյանն ֆեյսբուքյան իր էջում հրապարակել է հանրաքվեի քարոզարշավին «Այո»-ի պաստառներից մեկը: Մեկ այլ գրառմամբ էլ վարչապետը երեք տարբեր գույների պաստառներ է հրապարակել՝ ցանկանալով պարզել՝ երեք տարբերակներից ո՞րն են ավելի շատ հավանում օգտատերերը: Վարչապետի աչքից, սակայն վրիպել է, որ պաստառը պարունակում է տառասխալ: Ոչ թե «հեղափոխությանը ասում եմ այո», այլ «Հեղափոխությանն ասում եմ այո»: Վարչապետի հրապարակած լուսանկարներում ձայնավորից առաջ ոչ թե բաղաձայն է օգտագործվել, այլ կրկին ձայնավոր:  Նշենք, որ նման սխալի դեպքում քննություններում միավոր են հանում: Ուղղեք տառասխալը, քանի դեռ Լեզվի կոմիտեի նախագահ Դավիթ Գյուրջինյանը չի նկատել այն»: