Նյու Դելիում քաղաքացիության մասին նոր օրենքի հակառակորդների և կողմնակիցների ընդհարումների հետևանքով զոհվածների թիվը հասել Է 42-ի: Այդ մասին հայտնել են Գուրու Թեգ Բահադուրի հիվանդանոցի բժիշկները, տեղեկացնում Է «Արմենպրես»-ը:

Նոր օրենքի կողմնակիցների ու հակառակորդների միջև բախումները Նյու Դելիի մի քանի շրջաններում սկսվել են փետրվարի 24-ին: Մաջիփուր, Ջաֆրաբադ, Չանդ Բագհ եւ Կարալ Նագար շրջաններում տեղի ունեցած ընդհարումներից հետո Հնդկաստանի մայրաքաղաքի իշխանությունները պարետային ժամ են սահմանել այնտեղ, իսկ Դելիի գլխավոր նախարար Արվինդ Քեջրիվալը կոչ Է արել կառավարությանը՝ բանակային ուժեր մտցնել այդ շրջաններ: 

Քաղաքացիության մասին Հնդկաստանի օրենքի նոր խմբագրումը, որն արդեն սկսել Է գործել, նախատեսում Է Հնդկաստանի քաղաքացիության պարզեցված տրամադրում ոչ մուսուլմանների Հարավային Ասիայի մի շարք երկրներից՝ Պակիստանից, Աֆղանստանից եւ Բանգլադեշից, եթե նրանք հալածանքների են ենթարկվում հայրենիքում: